Despois de discutilo Bouzada e mais eu chegamos a esta proposta

crossword - grid - clue

encrucillado - gradicela  - definición


Desbotamos

grella, cruzado, cuadrilátero, cuadrícula, debuxo, diagrama,

Resulta rechamante que ata hoxe non haxa unha palabra especializada
con este valor. O dicionario RAG permite chamarlle ao debuxo dos
cadros do xogo tamén "encrucillado" pero resulta totalmente impreciso
para manexar un software de creación de encrucillados como o genxword.
Pódese aceptar como sinónimo hiperónimo pero... "un encrucillado
consta de dous elementos: cadros asociados en forma de liñas cruzadas
que forman unha figura de encrucillado"?

Por certo, este tipo de precisións deberían estar na definición da
palabra "encrucillado" pero o que nos atopamos é que a definición do
DRAG está "fortemente inspirada" na do DRAE (ou ao revés pero non
creo) e como o orixinal non o fai, a RAG tampouco.

Gradicela, trátase dunha palabra enxebre que se fai sinónima de malla,
que está decaendo no seu uso e que resulta perfecta para a súa
recuperación (reixa, enreixado, gradicela): un encrucillado é un xogo
de palabras que consiste en encher coas súas letras unha gradicela que
combina as palabras adecuadas suxeridas polas súas definicións
cruzándoas de modo preciso no debuxo que forma a gradicela.

De feito, resultaría tamén moi recomendable para todas as traducións
do «grid» inglés en programas de deseño ou debuxo. Na nosa opinión
debería dárselle prioridade antes que usar «grade»

Definición non ten problema ningún e ademais xa se utiliza amplamente
neste contexto.
_______________________________________________
Proxecto mailing list
Proxecto@trasno.net
http://listas.trasno.net/listinfo/proxecto

Responderlle a