CARO MANCARI PITIH
Macam-macam caro urang mancari pitih, dari nan hala,
satangah hala, saparampek hala sampai nan indak hala.
Kalau nan hala, adolah nan mambantiang tulang -
mangureh karingek sacaro luruih, baretong kaawak
mainggo kaurang, jaan sampai awak kadirugian urang
jaan pulo sampai hak urang tamakan di awak. Di dakek
ambo tingga ado surang urang tukang, urang Jawa, ambo
sabuik namono mas Pono. Sajujur-jujur ati, iri ambo
kaano. Sangaik luruih, amanah, pakarajo kareh, indak
banyak kecek, rajin sumbayang. Panah bakarajo di
rumah ambo katiko rumahko ambo paeloki, iyo bana indak
ado nan paralu diupekan kaano doh. Pagi datang pukuah
tujuah, langsuang bakarajo, indak ado perai duduak
sambia maisok (ano indak parokok), baranti katiko
urang abang ka sumbayang luhua, baliak pukuah satu
bakarajo pulo baliak sampai pukuah limo. Luruih, alun
panah ambo kacudiran saketek juo lai. Iri ambo, sabab
panghasilan si mas Pono kolah nan sabarasiah-barasiah
rasaki, upah jaleh satiok ari, dan iko nampak
disukurino bana.
Ado pulo urang nan bakarajo mambantiang tulang juo,
bakureh karingek juo, dapek upah nan hala, tapi kok
ado nan tajumbai abih juo dimakan guntiangno, kok ado
nan kiro-kiro dapek dibao lalu, iyo bana dibao laluno
pulo. Urang sarupo iko ibo awak mancaliak, amuahno
mampacampuaan nan barasiah jo nan kumuah, nan hala jo
nan indak hala. Dan asia sarupo iko kadiagiahkanno
kaanak binyino.
Ditangah sarikno ekonomi sarupo kini macam-macam pulo
aka urang mancari rasaki. Di Banduang, (ambo agak
rajin ka Banduang kudian-kudianko), di satiok lampu
merah, batambah banyak kini anak-anak mudo pangamen
jalanan, bagitar, manyanyi untuak mangumpuaan sapiak
duo piak. Nan jadi sasaran mareka, tanyato adolah
panumpang angkot, karano oto paribadi jarang nan amuah
manurunan kaco jandela oto, mungkin dek takuik raso
indak kaaman. Dek ambo labiah sanang naik angkotko
antaro stasiun jo Dago (daripado naiak taksi nan
indak nyaman saketek juo disampiang supirno banyak nan
indak luruih) jadi pamandangan bana diambo tingkah
polah paja-paja pangamenko, nan salalu mintak izin ka
pak supir sabalun manyanyi jo bagitar, disampiang
banyak nan mamuloi jo �assalamu�alaikum� bagai. Kok ka
dikecekan ibo, iyo ibo pulo awak mancaliak anak-anak
mudo matah nan mangamenko, namun mungkin bia juolah,
daripado mareka mangarajoan karajo nan bukan-bukan.
Manjua suaro jo mangamenko, nan kini sadang manjadi
bana di Banduangtu, manganaan ambo ka Pasa Pusek Pakan
Baru di taun 67/68. Ado tukang saluang jo tukang
dendang nan biaso duduak di Pasa Pusektu ampia tiok
malam, rami dirubungi urang. Baganti-ganti urang
mintak lagu (saluang), kadang-kadang mati mamatian.
Ditukang dendang jo tukang saluang iko nan katuju bana
dino sabab satiok nan kamamatian lagu mintak dituka jo
nan lain maampokan dulu pitih nan paliang kurang samo
banyak jo nan diagiahan urang nan sabalunno.
Taun-taun itu ekonomi di nagari awak sadang baransua
kaelok saketek sasudah kalibuik taun 65.
(basambuang insya Allah)
__________________________________________________
Do You Yahoo!?
Get email at your own domain with Yahoo! Mail.
http://personal.mail.yahoo.com/
RantauNet http://www.rantaunet.com
=================================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
=================================================
WebPage RantauNet dan Mailing List RantauNet adalah
servis dari EEBNET http://eebnet.com, Airland Groups, USA
=================================================
