Re: [RantauNet] Caro Mancari Pitih (urang mintak sidakah)

[Muchti A. Dani]

Assalaamu'alaikum Warahmatullaahi Wabarakaatuh. Subuah cako, sasudah mambaco surek Al-baqarah ayaik 83 dalam kitab "Translation of the meanings of The Noble Qur'an in the English Language - by Dr. Muhammad Taqi-ud-Din Al-Hilali and Dr. Muhammad Muhsin Khan", penerbit: King Fahd Complex for The Printing of The Holy Qur'an, Madina, takana di ambo baliak curito Angku Lembang Alam nan sarianu: "Ado pulo carito urang mintak sidakah. Baiak nan di lampu-lampu merah,ataupun di jambatan-jambatan panyubarangan, di gang nan banyak dilalui urang, di pasa atau di ma sajo. Ado nan iyo cacaik, antah buto,antah lumpuah, antah pontong kaki, tapi nan agak unik adolah induak-induaksambia mamangku bayi,kadang-kadang sambia manyusuan paja ketek tu bagai di tapi jalan." "Dek  lalu di jalan nan ampia samo tiok ari, jadi paratian juo diambo, ado urang satangah bayo nan biaso mintak sidakah dilampu merah sambia bajalan tatatiah-tatiah sarupo urang lameh sangaik. Sakali wakatu katiko ambo lalu labiah pagi dari biaso nampak baliauko bajalan sangaik sihaik, tagok jalanno kaarah tampekno baoperasi. Katiko tacaliak bana diambo mukono dibaono manakua,mungkin taraso juo malu agakno." "Pakaro urang mintak sidakahko ado pulo nan agak istimewa ciek, nan biaso baoperasi di lampu merah 'parapatan' Halim kalau awak dari arah tol Cikampek. Ado urang gapuak maosoh-osoh di jalan mangamehi pitih nan di ampokan urang. Maosoh-osohko rupono kalau sadang dinas sajo, sabab kalau alah salasai biko,tagakno elok-elok, bajalan pulono elok-elok. Kudian-kudianko bana alah agak jarang nampak. Antah kok dek alah samakin jarang urang amuah maampokan pitih dek tau baliauko nan sabanano atau ado sabab lain indak jaleh diambo." "Ado juo urang-urang gaek padusi, biaso di tapi-tapi jalan juo, biasono pagi-pagi bana diturunan urang dari oto barombong-rombongan. Nampakno nan sarupo iko ado pulo 'koordinator'no." "Nan agak manyadiahan katiko tau nan bahaso anak-anak padusi mudo bajilbab nan biaso mintak sumbangan sambia maonyokan kotak sumbangan antah untuak anak yatim antah untuak pambangunan musajik, tanyato manuruik surang ustad di musajik ambo adolah urang cadiak aka mancari pitih untuak no surang dibawah koordinator pulo. Ustad nan bacaritoko sakali wakatu  pai bana mairiangan kama paino sasudah baoperasi gadih-gadih bajilbabko nan tanyato katampek pamondokan nan bukan rumah yatim, bukan musajik, bukan sakola agamo. Disalidikino bana apokoh paja-pajako mangumpuaan pitih untuak diantakan kapanguruih musajik di daerah anu, tanyato indak. Antahlah kalau sakalian padusi bajilbab nan manyorong-nyorongan kotak di Jakartako iyobana sarupo itu atau ado nan sungguah-sungguah mancari sumbangan untuak musajik.Paliang indak dek carito tadi jadi ragu-ragu awak kabaragiah." "Pakaro mintak sumbangan sabanano banyak modelno. Ado nan datang karumah-rumah, mambao daftar, mambao surek pangantar nan bacap basetempel,kadang-kadang ado foto bangunan (musajik) bagai. Kecek ustad lain pulo nan sarupo ikopun banyak nan kicuah. Panah datang urang mintak sumbangan sarupo iko, ado daftar-daftar panyumbang dari tampek nan agak bajauhan jo tampek tingga ambo, tapi sumbanganno gadang-gadang, saratuih ribu, limo puluah ribu. Awak indak baprasangko buruak doh, tapi iyo paralu juo awak agak bahati-hati. Sabab kalau tanyato sumbangan-sumbangan ko iyo bana kicuah jadi sato pulo awak badoso." Abo raso kalau awak ka maagiah-an sidakah ka urang-urang sarupo itu dek karano ibo mancaliakno atau alasan lain, tasarah di awak masiang-masiang, tapi tanyato nan dimukasuik jo Al-Masaakin dalam tafsirko bukan urang-urang nan bantuak itu. Ado footnote tantangan ayaik ko di halaman tampaik ayaik ko tatulih, yaitu halaman 16, barupo hadits: Narrated Abu Hurairah R.A. Allah's messenger SAW said, "Al-Miskin (the poor) is not the one who goes round the people and ask them for a mouthful or two (of meal) or a date or two, but Al-Miskin (the poor) is that who has not enough (money) to satisfy his needs and whose condition is not known to other, that others may give him something in charity, and who does not beg of people." (Sahih Al-Bukhari, Vol.2, Hadith No.557). Jadi manuruik pangaratian ambo, dalam ayaik ko Allah indak manyuruah awak "to be dutiful and good" ka urang-urang nan sarupo dicaritoan Angku Lembang di ateh doh. Aratino kalau awak indak maagiah-an sidakah bana, indak baa doh. Nan bedo, ka urang-urang nan sarupo itu awak "be dutiful and good" tapi ka nan sabana Al-Masaakin, tarutamo dunsanak/kawan nan dakek-dakek, awak indak panah basidakah (mambantu). Sakitu sajo dari ambo. Kalau pangaratian ambo tu salah, tolong dipelok-i.Maklum, umua sajo nan alah labiah satangah abaik, pangatahuan agamo masih dangka . . . . Wassalam, St. Batuah.