Assalamu'alikum wr.wb.,
Mintak maoh saketek ka urang lapau, lah tabang sin nan
partamu indak ba 'assalamu'alaikum' bagai. Iko carito
baisi-isi lapau gomah, dari pado langang sin.
Wassalamu'alaikum wr.wb.,
Lembang Alam
CARO MANCARI PITIH (2)
Katiko turun di stasiun Jatinegara, ambo maambiak
taksi di subarang jalan, sabab nan di muko stasiun itu
bana banyak nan tukang gadele, baago-ago bagai taksino
tu, sadang diambo iko nan maleh bana. Ambo stop taksi
nan ma sajo di subarang jalantu, baiak nan tarif lama
atau nan tarif baru, samo panah ambo dapeki. Walaupun
taksi itu bukan taksi nan tagak manantian panumpang,
taksi nan sadang jalan, salalu sajo ado urang nan
datang mahadang supir taksi, supirko sudah itu baduto
saketek sambia mangecekan �cuman ke Cawang�, sudah itu
maonyokan juo pitih saketek ka �urang bagak� tu.
Katiko ambo tanyoan sia urang tu, jawekno, �preman
sini pak, kalau nggak dikasih suka bikin ribut. Kalau
dikasih gopek itu saja kadang-kadang nanti nyamperin
kita lagi.� A iko gajala Jakarta. Namo resmi urang
sarupo itu adolah �tukang palak�, nan nampakno barasa
dari bahaso awak, sabab parangaino tu iyo sabana
mamalak. Tukang cikuih, tukang mintak pitih uang
takuik, nan kalau indak diladeni bisa mambuek runyam.
Nan dimintakno �gopek�, atau �seceng�, tapi kalau
saari ado sapuluah atau duo puluah taksi nan manyetor
atau tapaso manyetor, mako jadi lumayan juo
�panghasilan� tukang palak cako, cukuik jo modal awak
bagak dan nekaik saketek.
Tampek operasi tukang palak nan lain biasono di pasa.
Nan tamusaua dan acok masuak koran jadi carito ado di
Tanah Abang. Sasaran tukang palak di sinan bisa supir
angkot, bisa padagang kaki limo, atau bahkan mungkin
urang panggaleh di toko-toko. Abih maso baganti musin,
batuka urang nan manjabaik, namun tukang palak baitu
juo, gagah, bagak, indak talawan di urang.
Indak kalah pulo santiang adolah tukang parkir. Di
tampek-tampek satangah resmi, katiko kabaranti indak
nampak di awak sia-sia doh. Tapi katiko kabarangkek,
apolai kok musti agak mamunduran oto saketek, alah
tibo sin si Unjuik maambuih paliuik sambia basorak,
�terus�.terus�.� Babarapo kali panah ambo cubo
manggarahan sambia batanyo ma kuricih. Jawekno,
�Disini nggak pakek karcis pak.� Kok indak diagiah
pitih amuahno mamungkang oto awak atau paliang indak
bacaruik-caruik bungkang. Konon manuruik carito
tukang-tukang parkirko ado pulo induak samangno, nan
jadi kapalo urang bagak, nan kamanyuruah mangacau
biko kalau ado urang barani �macam-macam� atau indak
patuah kaparaturan mareka.
Labiah aluih saketek pado itu adolah urang nan biaso
sarupo manolong saketek, nan biasono di aiaprot atau
di parantian oto kalau di awak. Katiko awak kamanaikan
barang ka bagasi oto di aiaprot lah tibo sin urang
�manolong� maangkekan. Baitu juo katiko awak
kamanjawek barang dari ateh oto kalau diparantian oto.
Sudah itu tantu sajo dimintakno pitih. Kalau lai
wajar-wajar indak pulo baa doh. Tapi kadang-kadang
kalau lah awakno pulo surang nan manantuan, limo ribo,
kecekno untuak maangkekan kopor ketek wak kabagasi
taksi misalno iyo sakik juo ati awak.
Semboyan marekako mungkin �you get the money, then I
palak you, palak is my life.�
(bersambung insya Allah)
__________________________________________________
Do You Yahoo!?
Get email at your own domain with Yahoo! Mail.
http://personal.mail.yahoo.com/
RantauNet http://www.rantaunet.com
=================================================
Mendaftar atau berhenti menerima RantauNet Mailing List di
http://www.rantaunet.com/subscribe.php3
ATAU Kirimkan email
Ke / To: [EMAIL PROTECTED]
Isi email / Messages, ketik pada baris/kolom pertama:
- mendaftar: subscribe rantau-net [email_anda]
- berhenti: unsubscribe rantau-net [email_anda]
Ket: [email_anda] = isikan alamat email anda tanpa tanda kurung
=================================================
WebPage RantauNet dan Mailing List RantauNet adalah
servis dari EEBNET http://eebnet.com, Airland Groups, USA
=================================================
