[RantauNet] Amanat rang minang di Medan

[Wahdi Azmi]

Assalamualaiku Wr. Wb. Salam baririang sambah ambo sampaikan kapado angku-angku niniak mamak, cadiak pandai, sarato jo bundo kanduang nan barado di tangah balerong nangko. Nan tau di ereang jo nan gendeang, tau diraso jo pareso, tahu jo kilek jo nan bayang, tahu alamaik kato sampai. Pihak kapado diri ambo, nan kaciak mudo matah nangko, bagabuang ka RN iko iyo ado basabab ba mukasuik, mambaok namo BM tigo, Badan Musyawarah Masyarakat Minang kapanjangannyo. Di medan johor salingkuanganyo. Pihak kapado BM3 Medan Johor , bak rabuang jolong mambacuik, bak umua bilangan hari, baruweh satampuak alun, gadang disiram ambun malam, batang gampa sambilu indak, urek alun mancakam tanah, pucuak alun madapek angin, iduik diruang rumpun batuang, antah pabilo kabasaga. Pado malam kamih nan kapatang alah dilantik kapengurusan, sato ambo didalam sinan, pauruih organisasi jo pengkaderan, Samulo ragu dalam hati, kok lai urang nan ka datang, kursi saribu tagak surang, urang langang sakuliliang. Baitu tambua dihoyak rang mudo, tari galombang manjalang pulo, silek jo randai tuka batuka, ditingkahi jo tari piriang, Galanggang rami sakutiko. Cameh jo sanang ganti baganti kok tamuek tampek nangko, urang bagaduru cando samuik, kursi nan indak cukuik pulo. Mancaliak urang rami sangaek, tasirok darah dalam dado tabayang mandat yang dipikua, Takana amanah dan kadijalani. Satantang daripado itu, maadok ambo kapado sado dunsanak cadiak pandai nan ado dalam balerongko, kok dibari kami pandangan, dituntun dari jauah di bimbiang dimanasiaki sabab ambo tau banyak dunsanak di balerongko nan punyo wawasan luas, pangalaman sarek, tau urang tampek bantanyo, banyak pulo nan tingga di lua nagari. Untuang kok elok palangkahan, dek masin lidah matoari, dek dingin tangan katuanyo, talakik rabuang jadi batuangnyo baurek bagumpa gadang, babatang baruweh ruweh,badaun rimbun jo rancak, tabiang diagak jan nyo runtuah, lurah mamuji kalinduangan, bukik diateh ndak taseso. Nyampang talakik tinggi isuak, batang nyo runduak kabawah, pucuknyo kulai kabumi, manyilau tanah manggadangkan badarun pintak kalangik, mamohon kapado tuhan, andaknyo BM3 ko , bak ambalau lakek kahulu, bak pisau diasah tajam, bak karih lenggo geni, basimpai jo kasiah sayang, bahulu jo kabanaran, barakek kato saiyo, sanyawa tak carai tangga, bapisah urang jo manusia, sinan katangga kaduo nyo, itulah pintak pinto kito maampang lalu kasubarang, mandindiang sampai kalangik, manjago cabuah kok njo tumbuah, sibaka maliang jo cilok, manjago barih kok talampau Manjago cabuah kok tumbuah, mamaliharo sia jo nan baka, manjago cakak jo kalahi, mamaliharo sumbang jo salah Sabab, Lautan sati rantau batuah, langik lueh indak batapi. Raso aia ka pamatang, raso minyak kakuali, nan bakabek rasan tali nan babungkuih rasan daun, cadiak dikampuang, kampuang patahankan, cadiak suku suku patahankan, cadiak nagari nagari patahankan, cadiak bangso bangso patahankan. tarapuang samo anyuik, tarandam samo basah, parang pusako samo dilipek, parang samun samo diadoki. kok dianjak urang batu pasupadan, dirubah urang kato pusako, dirubah kato nan bana, nan condong diariah urang, nan lamah dititih urang, Saciok bak ayam sa danciang bak basi samo samo kito adok-i Saukua mako manjadi, sasuai mako takanak, yo kok pandai bamain budi, urang jauh jadi dunsanak Akhir kato, Tak ado gadiang nan tak ratak Tak ado tupai nan tak gawa Manusia basifat kilaf Nan qadim hanyo sifat tuhan Suruaik langkah dari angku-angku sado dunsanak niniak mamak nan gadang basa batuah, alim ulama cadiak pandai, sarato jo bundo kanduang payuang panji dalam kampuang. Basusun jari nan sapuluah sabaleh jo kapalo, dipuhun rila jo maaf bakeh ambo. Kok ado kaba nan ka disampaikan, kok ado file nan baguno, taraso gadang ukurannya�, jan ragu, kirimkan lansuang ka email ambo. Sado balasan nan ambo tarimo akan di print dan di dokumenkan oleh BM3 Medan Johor. Tarimokasih banyak, Wasalam Wahdi Azmi Koto

---