Wa'alaikum Salam wr.wb, Iko sakadar jawab takok2 uok se nyo ko Mak (ambo iyo sabana tukangnyo Mak-bahaso kerennyo Teknisi eh..eh, indak ahli sosiology bagai do). Tapi kalau di-uruik dari parang paderi rasonyo talampau jauah. Kok mancaliak faktanyo, sasudah paderi tu urang Minang bantuak2nyo sempat manamukan kasaimbangan baru nan bapijak ka hasie kompromi ABS-SBK (nan kiniko lah manjadi dendang tanpa makna dek pajabaik2 dikampuang). Nyatonyo sasudah maso tu, Minang masih bisa mamproduksi intelektual2 (nan ambo mukasuik INTELEKTUAL, indak ado sangkuik pauik nyo jo 2000 doktor urang minang do Mak)
Nampak2nyo iyo PRRI nan manjadi galodo. Alun jadi mancaduak lai lah tibo pulo gelombang feodalisasi jawa ndeso (kok ado bagai nan maanggap ambo sukuisme, harusnyo urang2 saroman Kunto Wijoyo, Mangun, Darmanto Jatman dll harusnyo bisa dianggap penghianat urang jawa eh..eh). Lansuang gayuang basambuik dek slogan Mambangkik Batang Tarandam, mako ta-ekploitasi lah bakaik materialistis urang Minang (sabananyo kalau takontrol halal2 sajonyo). Kini samo2 bisa awak liek kalau nan tumbuah tu Raden Mas- Raden Mas jadi2an nan maukua nilai manusia dari jabatan, pancapaian materi, tingkaik pandidikan (mungkin mak SBN satuju jo ambo kalau tingkat pandidikan kadang2 indak basangkuik pauik jo tingkaik intelektual manusia), tarutamo pandidikan nan bisa mahasiekan pitih capek. Masalah caro mancapainyo indak talampau penting. Ujuang2nyo awak diantakan ka hukum rimbo, kesempatan cuma tabukak untuak urang bagak. Nan paliang taraso akibaiknyo ka distribusi SDM, dek urang mamiliah sakolah sa-mato2 sasuai jo parmintaan pasa, indak badasarkan talent jo ability. Jadilah jurusan2 nan saharusnyo dibutuhkan SDM kelas satu diisi dek manusia kelas kambiang, nan saharusnyo cukuik diisi dek manusia kelas kambiang diisi dek manusia kelas satu (malah banyak diisi dek sabana kambiang nan bisa mambali). Ado nan lah panuah kapalonyo jo bahan tapi indak pandai manalar, ado nan pandai manalar tapi indak cukuik bahan. Jadi indak aneh Mak, kalau awak tu gampang diatua urang. Padahal bukannyo fungsi pandidikan tu untuak ma-optimal-kan potensi manusia? Bukannyo penghargaan untuak pancapaian anak retarded nan bisa dididik maapuih salemo surang harusnyo satinggi si jenius jadi profesor? Lha, kalau lah sadonyo ta fokus ka model pancapaian primitif saroman itu, tantu sajo indak tadukuang lai dek alam. Mungkin baban alam agak bakurang kalau bantuak kekayaan tu bisa di- diversifikasi-kan ka bantuak nan agak baradab. Contohnyo, untuak urang nan mamiliah jalan iduik di industri intelektual, harusnyo kekayaannyo diukua dari Ilmu pengetahuannyo, sadangkan materi harusnyo dilatakkan sabagai faktor pandukuang untuak mangambangkan ilimunyo. Tokh Hamka pernah jadi tukang cuci piriang untuak bisa mangaji. Tokh Hamka mangaji dek niaik nak bailimu, indak untuak manjadi kiyai milioner. Kalau mamiliah jalan jadi pamong, harusnyo kekayaannyo diliek dari kamampuannyo malayani masyarakaik, indak dari man-cilok-i pitih untuak jadi urang tapandang. Kalau dokter harusnyo diukua dari kamampuannyo manyanangkan urang sakik, indak kapandaiannyo minta sidakah ka pabrik farmasi. Sagitu se dulu Mak, maaf se pabanyak kok salah2. Wass, JD RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================
