Assalaamu'alaikum wa rahmatullaahi wa barakaatuhu Santiang carito angku Taufiq St.Rajo Ameh ko. Sato takana lo di ambo pakaro bulau, pakaro kopi babungkuih jo kurisiak, pakaro kain ganiah jo marekan. Bulau ko iyo akrab jo awak saisuak, baju putiah, baju saragam untuak upacara hari Sinayan katiko sakola SMA di Birugo Kiktenggi, iyo ba bulaui tu mangko ka elok. Nak nampak nyanyang putiahno. Agak tadaulu pado itu, sabalun kain tetoron dijua urang, katiko baju putiah iyo bana masih kain ganiah lai baru, ado treatment lain ciek lai untuak kain baju atau sarawa. Bakanji. Kain baju jo sarawa tu barandaman ka cairan tapuang kanji, tapuang kapelo batang, nan amuah dibuek-an ka parakek (parakek alang-alang) amuah dibuek-an ka panganji. Duo sendok balanjuang tapuang kanji ko disiram jo ayia angek baru mangalagak, sudah itu dikacau, baru ditambah jo ayia dingin. Alah pakek-pakek bak kian larutan ayia tu. Kadalamno dimasuak-an kain nan ka dikanji, sudah itu kain bakanji tu diracik lalu dijamua. Katiko kariang dek paneh matoari iyolah ampia sarupo karupuak kain baju atau sarawa tu. Katiko ka manggosokno (jo tarika ba baro tampuruang) di kalatiak-i dulu jo ayia. Sabana kareh sandiang baju atau sarawa nan batarika sasudah dikanji tu.
Kain ganiah, salain ka baju guntiang cino, nan dipakai jo sarawa batiak, salain dibuek-an urang padusi ka tilakuang, dipakai juo ka kain kapan, pangapani mayik. Nan ganiah untuak kain kapan ko agak ringan saketek, agak balain jo ganiah ka baju. Kalau pakaro kain marekan, jaan-an ka inyiak-inyiak awak, ambo, katiko muloi ka mamakai sarawa dalam iyo sarawa dalam marekan tu bana nan babakai. Ado nan bajaik surang. Baagiah batali. Ado juo nan baagiah karet / kajai katapel nan baguntiang ketek-ketek. Dialiah kaji ka kopi babungkuih kurisiak. Nampak-nampak bana di ambo amai-amai manjujuang kaleang tampek kopi tu. Sarupo takana-kana diambo dendang urang basaluang Rang Bukik Apik marandang kopi Tampak nan dari pandakian Walaupun rumik di dalam ati Kamuko usah nan kaliek-tan Di kami sabuak namono kami sabuik. Di urang nan pangopi bana, sabungkuih sabuak babungkuih kurisiak tu sadang elok untuak sagaleh kopi sin no. Iyo arun baunno katiko disiram ayia angek manggalagak. Dek angku Taufiq mangecek-an masih ado juo urang manjua di ateh janjang gantuang, bialah, kok bilo-bilo pulang ambo cari kian. Dikandak-an agak sabungkuih duo bungkuih. Lah panjang baputano carito pakaro kopi Sicincinko. Wassalamu'alaikum M.D.Saib St. Lembang Alam Asal: Koto Tuo - Balai Gurah - Bukit Tinggi 58 th / Jatibening - Bekasi On Fri, Feb 20, 2009 at 2:47 PM, Rasyid, Taufiq (taufiqr) < [email protected]> wrote: > Mak Ngah , > > Soal kopi ko salain kopi Sicincin, nan tampak lah diusahokan agak modern > dan punyo kemasan nan agak mantap adolah kopi dari Tanjuang Alam Tabek > Patah- Batusangka. > > > --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
