Iyo, sanang lo ati mandanga carito saisuak ko. Ambo manupang saketek postiang Angku Rev, Angku Tauafiq, jo Angku Lembang. Memang Angku Rev, MakNgah takana Kopi Sicincin memang sadang kadinginan, siap-siap kapai ka gym. Takana maso saisuak.
Carito Angku Taufik jo Angku Lembang sabana bairiang-iriangan katomangatoan. Nan bulau, nan marekan, nan kanji, nan sarawa kotok. Iyo, sarawa kotok kami dulu banyak babuaek sandiri. Ambo pandai lo manjaik, (di Ampek Angkek maso itu manjaaik ko lah manjadi palajaran rumah tangga sajak ambo tahu) baguntiang bajaik sandiri, diagiah lo tali piluruik. Bahkan masih tasabuik istilah "Sarawa Koto Ampek Angkek". Kini banyak sarawa-sarawa anak gadih untuak sport di gym di Amerika nan pakai sarawa batali piluruik ko. Biati lo asak mancaliak tali piluruikno takulai-kulai katu manari Zumba :) Kok kain ganiah jo marekan, sabalun itu nan alun dialami atau indak pandah dicaliak Angku Lembang jo Angku Taufik adolah urang babaju Kulik Tarok jo Sarawa Goni wakatu Japang. Wakatu itu Urang Awak sabana marasai. Kok lai baju-baju lamo nan indak kulik tarok, sabun lah jarang pulo, sahinggo tumo di baju jo pisak sarawa indak aneh lai, kutu di abuak pun indak lucu lai. Untuak sabun dipakai buah tanikia. Jongkeh rapek iyo bana barakaik gunono panjongkeh kutu... Manganai istilah "sabuak" salain kopi, adolo istilah "tukang sabuak" ka urang-urang nan suko mangaca pipi anak-anak ketek nan rancak manih. Apokoh "tukang sabuak" ko samo jo urang "paanak jawi" kurang jaleh lo di awak. Tapi indak disabuik "tukang kopi" doh, walaupun kopi jo sabuaak samo aratino. Di Pikumbuah "tukang sabuak" ko disabuik lo "Rajo Baun"... Kanji. Di Simpang Biaro sabalun bagolak 1958 ado duo Tukang Dobi basabalahan kadai. Ambo wakatu tu Guru ST-2 Bukittinggi acok balangganan ka baliau nan baduo ko. Iyobana rancak sadang elok kanjino, barasiah karajo mereka. Ambo sanang mancaliak karajo mareka kaduono. Tapi, untuak catatan sejarah, apo nan tajadi? Parang Suadaro iyobana kejam! Tukang Dobi ko, nan surang kawan saumua jo ambo, sapamainan sajak ketek, si Jun namono, dari Piliang Pasia Biaro. Anak no elok sajak ketek. Jujur dan luruih tabuang. Tukang dobi nan surang lai, agak tuo dari kami, lupo ambo namono, mungkin latakan sin lah namono Tan Idun. Wakatu PRRI si Jun ka Lua (manuruik kawan-kawan jo PRRI). Tan Idun jadi anggota OPR nan kejam disuruah-surah tantara Sukarno mancari-cari kawan atau dunsanak mareka nan kalua. Suatu hari, si Jun ditangkok dek Tan Idun dakek Baso. Dari Baso sampai ka Biaro (ampek kilometer jarakno), sapanjang jalan si Jun ko diaraknyo jo kaki jo tangan, dilakakino jo pangkabadia basamo-samo jo kawan-kawan OPR Tan Idun ko. Tibo di Biaro, lah lanyah badanno badarah-darah, indak pandai bajalan lai, indak pandai marauang lai, ditundo-tundonyo jo kaki dihiriknyo dicamopakanno ka halaman Urang Gaek si Jun ko, habih angokno takampai dihalaman Urang Gaeknyo. Mati syahid taaniayo dek OPR. Inna lillahi wa inna ilaihi raajiuun... Itulah salah satu Carito Sadiah Parang Saudara nan masih tatap dalam kenangan famili dan masyarakat di Biaro... Indak lamo sasudah itu, "utang babaia, piuatang batarimo." Suatu malam kalam Tan Idun ko diimbau urang malapor dari laman rumah binino di Lungguak Muto. "Tan Idun, Tan Idun, kalaman lah ado kaba nan paralu!" kecek suaro dari laman. Tan Idun bukak pintu, mancogok kapalo kalua di ateh janjang. Saratono mancogok, badia malantang dari laman, Tan Idun jatuah dari pintu ka janjang, badabua ka batu tapakan, mati takangkang manabuihi dosono ... Itulah sekedar Kisah Nyata dalam kenangan maso lamo (1961); Sabingkah Kisah baa kejamno Parang Saudaro.... Salam, --MakNgah --- In [email protected], "Rasyid, Taufiq (taufiqr)" <tauf...@...> wrote: > > Mak Ngah , > > Soal kopi ko salain kopi Sicincin, nan tampak lah diusahokan agak modern > dan punyo kemasan nan agak mantap adolah kopi dari Tanjuang Alam Tabek > Patah- Batusangka. > [... bakuduang bukan bajilbab...] > > Itulah sekelumit curito tantang kurisiak, ganiah jo marekan..... > > Jadi kok ado nan dikecekkan urang : Kurisiak nak jadi daun....bukan co > ganiah mukonyo doh...tapi mungkin merah padam.....he....he... > > > > Salam > > St. RA 53+ --~--~---------~--~----~------------~-------~--~----~ =============================================================== UNTUK DIPERHATIKAN, melanggar akan dimoderasi/dibanned: - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi di setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama - DILARANG: 1. Email attachment, tawarkan disini & kirim melalui jalur pribadi; 2. Posting email besar dari 200KB; 3. One Liner =============================================================== Berhenti, kirim email kosong ke: [email protected] Daftarkan email anda yg terdaftar disini pada Google Account di: https://www.google.com/accounts/NewAccount?hl=id Untuk melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
