Assalaamu'alaikum wa rahmatullahi wa barakaatuhu
Sato pulo manambah carito saketek.....
Aden... adolah bahaso ka badan diri, aratino katiko awak mangecek jo urang
lain, manyabuik diri awak sandiri. Pabilo 'aden' dipakai? Dari pangamatan ambo
sajo, awak man'den' katiko urang alah mampa'waang' awak sacaro permanen.
Biasono iko tajadi dalam pargaulan samo gadang, jo kawan sa pamainan. Katiko
urang lain atau kawan-kawan alah ba waang, biasono otomatis awak manden kadiri
awak.
Panggilan ka badan diriko adolah hasia didikan mulo-mulo dari urang gaek awak.
Urang-urang tuo awak daulu maajai awak baa caro mambahasokan diri, sajak muloi
awak ka pandai mengecek, baumua sakitar duo tahun. Di lingkungan kaluarga kami,
masiang-masiang kami manyabuikan namo sandiri katiko mangecek jo nan labiah
tuo. Ibu ambo daulu manyabuik namo baliau katiko mangecek jo kakak-kakak
baliau. Baitu pulo di generasi ambo. Jadi indak baaden atau baawak doh. Sarupo
itu daulu diaja urang tuo. Tabao sampai kini, alah jadi inyiak urang. Kakak
sapupu ambo nan alah baumua 70 taun nan namo panggilanno Man, ba Man ka dirino
katiko no mangecek jo etek kami, sampai kini.
Baliak ka bahaso ba aden ko. Di lingkuangan samo gadang, iyo sarupo itu. Ba
aden, ba waang. Duduak di lapau basamo gadang sarupo itu sajo awak saliang
mambahasokan diri. Walaupun sabanano indak lo taruih manaruih sarupo itu. Ado
katikono barubah manjadi 'labiah haluih' jo ba ambo. Duo urang nan bakanti,
bakonco arek, katiko duduak di tampek urang baralek, malakukan pasambahan adat,
indak panah awakno salamo pasambahan tu ba aden ka dirino dan indak ka mungkin
pulo ba waang ka lawan bapasambahan tu. Mareka saliang maimbauan gala
masiang-masiang.'Alah sampai di Tan Bandarotu...... (Alah Tan Gindo).... Indak
do dikatoan alah, dek ambolai duduak baduo jo batigo lo jo baliau angku nan
tuo, nak ambobao kato jo mufakat, direnjeng kato jo baiyo, basifat mananti
Bandarojo panitahan........
Atau barubah sasudah bacarai bapuluah tahun. Jo kawan-kawan samo sakola di SR
(samo-samo lo mangaji, aratino samo-samo sapamainan 50 tahun nan lapeh), kini
basuo, indak pandai awak ba aden jo ba waang lai do. Alah barubah sajo jadi ba
angku ka ano jo ba ambo ka badan diri awak, walaupun indak saliang maimbau
gala. Alah 'risih' surang sajo awak ba aden jo ba waang. raso-raso kurang tapek
nan sarupo itu lai.
Urang-urang tuo kami nan maaja babahso 'haluih' ka diri awak jo manyabuik namo
surang tu bausaho panuah bana pulo jo indak panah mam pa-waang. 'Didi,
kamarilah, ko mak tuo mambuek goreng pisang untuak Didi.' Jawek si Didi,
'Goreng pisang ko iyo katuju bana di Didi go mak tuo.....'. Indak mungkin no
ka mangecek-an, 'Goreng pisang ko katuju bana di den.'
Sabab ado pulo di kampuang kami juo, urang tuo nan ba waang-waang ka anak
kanduang no dan si anak tanyato ba aden ka dirino katiko mangecek jo urang
tuono tu. Baitu pulo katiko awak alah sato-sato lo duduak di lapau dakek nan
tuo-tuo, katiko ado mak etek nan ba waang-waang, ba ansua-ansua jadi ba aden lo
awak mangecek jo baliau. Sabab kalau manyabuikan namo juo, banyak nan tuo-tuo
nan lain nan ka mampagarahan, ka mancimeean.
Di sakola di kampuang, ado dia antaro guru-guru nan biaso bana ba waang ka
murik-murik. tapi kalau ka guru indak ado murik nan barani ba aden do. Bahaso
resmi untuak diri sandiri di sakola adolah 'awak'. Katiko guru batanyo sia nan
tau jawaban, bacirabuik murik-murik manunjuak, sambia mangecek-an 'wak buk -
wak buk.' Mukasuik no 'saya ibu - saya ibu', kalau dalam bahaso Indonesia
Pangaruah caro mamanggia ka anak ko alah ambo buktian bana jo anak-anak ambo.
Antah baa, kami dulu ba kamu-kamu ka anak, (balain jo urang tuo nan manyabuik
namo awak, indak ba kamu atau ba waang). Tanyato anak-anak jadi ba aku ka
dirino masiang-masiang. Tapi manyabuik namo sandiri katiko mangecek jo pak
etek, jo etek, jo mak tuo mareka, sabab urang-urang tu indak ado nan ba
kamu-kamu ka mareka.
Nan panah tingga di Banduang alah mampakayo pulo caro mambahasokan diriko jo
'kito'. Iko tarjemahan langsuang dari 'urang' dalam bahaso Sunda, nan aratino
memang iyo 'kito'. Walaupun kito, kita dalam bahaso Indonesia bararati kato
ganti diri basamo jo urang lain nan awak tamasuak di dalamno. Urang Sunda punyo
pulo babarapo tingkek panggilan ka diri ko. Nan haluih ba 'abdi', iko dipakai
katiko mangecek jo urang nan labiah dihoromaik-i. Bahaso kasano 'aing', iko
mungkin satingkek jo 'aden' kalau di awak. Nan di tangah-tangah, itu tadi,
'urang'.
Wassalamu'alaikum,
Muhammad Dafiq Saib Sutan Lembang Alam
Suku : Koto, Nagari asal : Koto Tuo - Balai Gurah, Bukit Tinggi
Lahir : Zulqaidah 1370H,
Jatibening - Bekasi
--
.
Posting yg berasal dari Palanta RantauNet ini, jika dipublikasikan ditempat
lain wajib mencantumkan sumbernya: ~dari Palanta r...@ntaunet
http://groups.google.com/group/RantauNet/~
===========================================================
UNTUK DIPERHATIKAN, melanggar akan dimoderasi:
- DILARANG:
1. Email besar dari 200KB;
2. Email attachment, tawarkan disini & kirim melalui jalur pribadi;
3. One Liner.
- Anggota WAJIB mematuhi peraturan serta mengirim biodata! Lihat di:
http://groups.google.com/group/RantauNet/web/peraturan-rantaunet
- Tulis Nama, Umur & Lokasi pada setiap posting
- Hapus footer & seluruh bagian tdk perlu dalam melakukan reply
- Untuk topik/subjek baru buat email baru, tidak dengan mereply email lama
===========================================================
Berhenti, bergabung kembali serta ingin merubah konfigurasi/settingan
keanggotaan di: http://groups.google.com/group/RantauNet/subscribe
