KACO MATO "Oi... Piak, tolong antakan ambo ka Bukik Tenggi bisuak lah. Mato ko lah baraie tiok di pakai maliek, bia maliek dakek atau maliek jauah". Uncu Piah tibo-tibo mancogok di pintu dapua rumah upiak Banun. Upiak Banun nan baru salasai sumbahyang Asya, kudian sibuk mambuek pabukoan maangguak patuah. "Jadih, Uncu. Bisuak ambo antakan Uncu ka Bukik Tenggi pareso mato", jawek upiak Banun jo galak manih. "Tapi pitih uncu kini sadang sayuik, Bisuak kok pitih Uncu kurang, Upiak bisuak manambah untuak pambali kaco mato uncu yo?". Upiak Banun tambah galak-galak jo kurenah uncunyo. "Jadih Uncu, nan jaleh bisuak awak paresokan mato Uncu tu". Mandanga tu Uncu Piah jo gadang hati pulang baliak ka rumahnyo.
Pagi-pagi sudah sumbahyang Subuah, Uncu Piah lah tibo baliak di rumah upiak Banun. Barangkeklah upiak Banun mangawankan Uncu Piah ka Bukik Tenggi naiak oto Harmonis. Sapanjang jalan dari Maninjau, diajaknyo di upiak Banun ko Uncu Piah maota lamak, untuang-untuang Uncu lupo jo paruiknyo nan acok maloyo kalau malewati kelok 44 tu. Tibo di rumah sakik Akhmad Mukhtar, lah sato malah upiak Banun jo Uncu Piah antri manunggu doto mato untuak di pareso jo minta resep kaco mato. Basobok jo doto mato, Uncu Piah langsung bacarito: "Cubo lah di angku Doto, kok ado nan ambo liek, bia liek jauah atau lek dakek, mato ko baraie, kapalo sakik, apo ka dipiiciangkan se mato ko taruih-taruih? Cubo lah liek di doto ko ha, kaco mato ambo ko ndak cocok lai ndak. Tangkai kaco mato ko lah ndak cocok pulo lai doh. Apo paralu Angku Doto mambuekkan resep kaco mato sakaligus jo tangkainyo?" Pak Dokter mato agak galak tatahan, kudian madok ka upiak Banun, maliek upiak Banun maangguak-angguak, Pak dokter capek-capek maiyokan Uncu Piah. "Iyo Uncu, gagang kaco mato Uncu beko bia diganti pulo". Uncu Piah langsung galak sanang, "Kan iyo tu mah Piak, kecek pak Doto tangkai nyo pun lah paralu di ganti pulo". Sasudah dapek resep kaco mato nan baru, bajalanlah upiak Banun jo Uncu Piah arah ka Kampuang Cino, pai ka optik langganan upiak Banun. Tibo di sinan Uncu Piah langsung sibuk bacarito ka urang toko kaco mato baraso kacomato nyo lah paralu di ganti. Sasudah sibuk mancari-cari tangkai kaco mato nan ka di piliah, akhirnyo basuo juo model nan katuju. Diambiak lah dek urang toko diagiahkannyo ka uncu. Uncu Piah langsung mamakainyo. "Ha... iko iyo rancak mah Piak. Di ambo iko kacomato nyo nyoh. Kan lai indak maha bana doh kan?" Upiak Banun sambia galak bakulum manjawab, "Indak, indak maha doh Uncu. Kalau di uncu iko nan katuju, nan iko malah nan awak bali". Urang toko nan indak tahu jo kurenah Uncu Piah masih maajak uncu juo maliek tangkai-tangkai kacomato model lain, dijojokannyo juo babagai macam tangkai kacomato ka Uncu. Tapi nan pilihan gagang kaco mato ndak barubah. Sakali bapiliah, tatap itu nan dipiliahnyo. Baitu dicubokan ka muko Uncu Piah, beliau langsung bajalan ka trotoar di muko toko sambia malagak, "Lieklah di kalian, yobana iko kacomato nan sasuai di ambo mah, tu lah jaleh nampak urang bajalan dari jauah bagai kalau mamakai kaco ko", kato Uncu sambia manunjuak urang nan bajalan di bawah jambatan Limpapeh nan manghubungkan Benteng Fort de Kock jo Kabun Binatang tu. Uncu Piah sibuk mamparagokan baraso panglihatannyo kini yobana lah batambah tarang. Panek bajalan hilie mudiak bagaya jo kacomato baru tu, Uncu maimbau upiak Banun, "Piak, bayie lah kacomato ko, pulang awak lai". Akhirnyo karano lah tacapai kesepakatan dan lah sasuai pembayaran, urang toko kacomato maminta gagang kacomato nan dipakai Uncu tu baliak. Antah dek panek antah dek muak, Uncu Piah agak kurang saba nyo. Mangecek uncu Piah satangah mahariak, "Indaaak, di ambo nan iko nyoh. Lieklah sabana tarang mato den mamakai kacomato ko. Lah nampak di den urang bajalan di nan jauah tu ha...". Urang toko bingung jo agak takuik maliek Uncu Piah nan agak berang. Maliek kondisi tu, dibujuak lah dek upiak Banun si Uncu Piah ko lambek-lambek, "Uncu..., iyo kacomato tu nan awak bali nyoh, indak nan lain bagai doh. Kini tolong agiahkan baliak kacomato tu ka urang toko dulu yo..., bia di pasangkannyo bana dulu elok-elok kaconyo, tigo hari lai awak kamari baliak manjapuik kacomato tu...". :) Salamaik manjalankan ibadah puaso... Salam, RD Lukman NB. Tantu sajo upiak Banun ndak sampai hati mangecekkan taruih tarang ka Uncunyo bahaso nan dipakai Uncu Piah tadi cuma gagang nan lompong alun bakaco... Namun moral story nan ambo patiak dari peristiwa ko adolah... : Lamo iduik banyak dirasai, parabot badan makin dipakai makin ilat. Kito pun nantik antah baa kalau alah tuo, semoga ambo juo mampu belajar sabar menghadapi kurenah orang-urang tuo. Semoga hidup kita dapat bermanfaat kepada orang-orang di sekeliling kita, dan diberkati Allah. Wallahu alam... -- . Posting yang berasal dari Palanta RantauNet ini, jika dipublikasikan di tempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini dan kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur dan Lokasi pada setiap posting - Hapus footer dan seluruh bagian tidak perlu dalam melakukan reply - Untuk topik/subjek baru buat e-mail baru, tidak me-reply e-mail lama dan mengganti subjeknya. =========================================================== Berhenti, bergabung kembali serta ingin mengubah konfigurasi/setting-an keanggotaan di: http://groups.google.com/group/RantauNet/subscribe.
