Assalamu'alaikum ww, Bapak/ibu dunsanak di Palanta, awak ka mancubo manulih sado nan takana susudah basato ba HBH Silaturrahim RN sarato HBK IKMR di Pakanbaru. Supayo indak bakalibuik bana mako awak akan tulih basambuang. Dari tulisan nan awak buek alah pasti ado salah jo kurangnyo, mako untuak itu bari ringan awak dek kito basamo untuak samo-samo manyamparonoannyo supayo labiah paguno dimaso nan ka datang.
Dari nan dapek wak tangkok uraian sarato isi dari carito jo pidato barikuik sabagiannyo nan bisa kito parambiak basamo, yaitu : 1. Kumbali ka Nagari Dalam diskusi di RN disampaian baa usao kito basamo rang rantau untuak samo-samo sato mamajuan nagari. Dalam diskusi kito basamo alah samo sapakaik kito basonyo kalo nio mamajuan Sumatra Barat mako langkah paratamo nan paralu dimajuan adolah Nagari nyo. Pabilo nagari-nagari alah maju mako sacaro umum nan Propinsi tantu alah sato maju pulo. Salah satu caro dikito urang rantau nan bisa dilakukan mamajuan nagari adolah jo caro mampakuaik parsatuan antar nagari di rantau masiang-masiang baitu juo parsatuan antaro satu rantau jo rantau nan lain dari masiang-masiang anak nagari. Kalo untuak nan di kampuang alah sarancaknyo pulo dimuloi karajo samo antaro para Wali Nagari/Kepala Desa nan ado di Sumbar untuak saliang batuka informasi jo salah satu caro nan bisa ditampuah adolah saliang bakunjuang dari satu nagari ka nagari nan lain. Dari hasil kunjuangan ikolah bisa diparambiak a nan elok dinagari nan dikunjuangi nan bisa pulo dikambangan dinagari masiang-masiang nan lain. Baitu juo dalam pamiliahan Wali Nagari/Kapalo Desa nan paralu dicari jalan kaluanyo baa supayo indak tajadi pamiliahan nan ka maabihan energy sarato pitih nan indak kalah pulo baa upayo supayo indak tajadi pasaiangan antaro Mamak jo Kamanakan, Adiak jo Dunsanak sarato Apak jo Anak dll nan ka mamparabuik an kurisi Wali Nagari/Kapalo Desa. Kalo dalam pamarentahan untuak kumbali ka Nagari bisa diambiak contoh Nagari "Sariak" di Kacamatan Sungai Pua - Kab. Agam nan alah manerapkan pamiliahan wali nagari badasarkan hasia rapek KAN, saroman nan dikabaan mak Bandaro Labiah di rumah pak Irsyal kapatang. Insya Allah dimaso nan ka datang Bupati Agam tapiliah yaitu pak Indra Catri Dt Malako Nan Putiah akan manerapkan baliak sistim pamilihan babasis nagari nangko saroman nan alah dibuktikan kasuksesannyo di nagari Sariak cako. Kalo ado diantaro kito urang Palanta ko nan sabana nio baniaik untuak mamajuan Nagari nyo (masiang-masiang talabiah daulu) kito Alhamdulillah lai punyo pakarnyo untuak itu nan alah samo indak paralu kita raguan lai kamampuannyo dalam mamajuan Nagari ko yaitu pak Rainal Rais nan terkenal jo SAS nyo. Bagi kito nan ka mamaraluan bimbiangan sarato pitunjuak baa caronyo mamajuan nagariko mako dipasilahkan maubuangi pak Rainal untuk bakonsultasi bilo paralu bao baliau ka kampuang kito supayo labiah padek lai. Kok ditanyo masalah bara pulolah "Piak" ka dikaluaan untuak ongkoih jaso pak Rainal ko mako kito ndak usah ragu karano pasti dijamin "Perai", untuak masalah piak iko. Pak Rainal alah mangatoan baso untuak masalah pangambangan ba Nagari bilo paralu baliau basadio datang ka Nagari kito masiang-masiang tanpa ado "Biaya Dinas". Masalah fungsi KAN nan kini alah lamah di Nagari adolah hal nyato nan aruih kito tarimo karano memang dalam sistim pamarentahan kini kakuasaan tatinggi talatak di tangan jajaran pamarentahan sampai ka bawah. Kok daulu para Niniak Mamak atau KAN mambuek satu kaputusan atau asia mupakaik mako itu adolah bagian nan sugiro paralu di tindak lanjuti kato mupakaik nantun, tapi indak bak nantun kaadaanyo kini nan kato putuih ado pamarentah nagari jo jajarannyo. Saroman dikatoan mak Azmi Dt Bandaro, kalo dulu niniak mamak mangatoan "bisuak kito bagotong royong mambarasiahan banda", mako bisuak tu insya Allah kito akan mancaliak akan bagadurunyo anak nagari untuak datang ba gotong royong. Tapi cubo kini itu dikecek an tantu sakiro-kiro kito alah samo tau a nan ka kito caliak bisuak itu. Kini labiah banyak gotong royong kagantinyo baupahan supayo mak jalan karajo ko. Ado cieklai nan paralu kito paratian jikok ka babuek baiak untuak kampuang, ancak dicaliak situasi daulu sabalun babuek karano kalo kito ka babuek baiak tapi alun kanai caronyo mako mungkin kito akan mandapek "baibo ati" dek a nan kito sampaian kurang ditangkok dek urang kampung. Saroman kisah ibu Isna, lah dicuboan manyampaian a nan ka elok nan ka dikakok untuak kamajuan nagari tapi indak baitu jadi paratian dek urang kampuang, tapi suatu kutiko a nan disampaian dek buk Isna cako disampaian dek kapalo desanyo mako sakutiko kagiatan itu bajalan saroman nan diniaik an dek ibu Isna. Jadi ado diagiah jalan kalua dek pak Rainal untuak maadok i situasi saroman iko yaitunyo jo caro baiyo batido dulu jo urang kampuang, bilo paralu diundang parwakilan atau babarapo urang untuak mampaiyoan kakok nan ka dihadang sainggonyo urang kampuang nan maraso tinggi indak kalangkahan nan lambek indak kadauluan. Babaliak kito ka pangka kaji, kalo sabana iyo kito ka baniak untuak babaliak ka Nagari atau mamajuan Nagari mako karajo paratamo nan paralu dikakok adolah mambuek sistem atau pitunjuak karajo nan saimbang antaro kabutuahan nagari jo a nan kito cito. Karano kalo iko indak kito pasiapkan bana-bana mako akan tajadi kapincangan didalam penerapannyo dilapangan nantik saroman nan di riasauan dek nyiak Dt Rajo Jambi atau nan labiah kito kenal jo Ajo Buyuang. Baa dek baitu karano kini indak sado daerah di Sumbar kini nan babantuak nagari, saroman di Piaman indak Nagari Namonyo doh baitu juo nan di Kota Madya nan banamo Lurah atau sabagainyo. Jadi kok iyo bana RantauNet baniaik ka Manjadi Penggerak untuak kamajuan nagari mako langkah nan paratamu dilakukan adolah mambuek Karangko Acuan ba Nagari nan bisa dipakai dek nagari lain di Sumbar saroman kasimpulan mak Tan Ameh malam tu. 2. Ekonomi - Investasi Basambuang............ -- . * Posting yg berasal dari Palanta RantauNet, dipublikasikan di tempat lain wajib mencantumkan sumber: ~dari Palanta r...@ntaunet http://groups.google.com/group/RantauNet/~ * Isi email, menjadi tanggung jawab pengirim email. =========================================================== UNTUK DIPERHATIKAN, melanggar akan dimoderasi: - DILARANG: 1. E-mail besar dari 200KB; 2. E-mail attachment, tawarkan di sini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi disetiap posting - Hapus footer & seluruh bagian tdk perlu dlm melakukan reply - Untuk topik/subjek baru buat email baru, tdk mereply email lama & mengganti subjeknya. =========================================================== Berhenti, bergabung kembali, mengubah konfigurasi/setting keanggotaan di: http://groups.google.com/group/RantauNet/subscribe.
