Mama
manAr, saurna mama kantos ngiringan "Panampakan" di hiji hotel di jakarta ??
abdi kenging wartos ti urang milis oge Imas, saur Imas mama waktos ningali
Panampakan di tempat pangojayan, langsung ngiprit ka kamarna, padahal mah saur
Imas, anu ngajirim eta teh sabangsa "Jin" istrina... gareulis
deui...
duh
bagja nya mama mah parantos tiasa ningali ka alam Ghaib...
-----Original Message-----Baraya,
From: o_arahman [mailto:[EMAIL PROTECTED]
Sent: Friday, June 18, 2004 2:44 PM
To: [EMAIL PROTECTED]
Subject: [UrangSunda] Teknik Anyar "Penampakkan" jeung Anti Teluh
Jero saminggu ieu, aya dua informasi (hehehe "informasi", siga dina
presentasi MLM bae) anu kungsi kailo ngeunaan "dunia lain" atawa
alam gaib anu lumayan rada ngagetkeun lelembutan jeung pikiran. Dua-
duana pakait jeung teknik, teknologi atawa cara anu "bisa
dipelajari". Anu kahiji, ngeunaan teknik ngahadirkeun "dunia lain"
anu acarana akhir-akhir ieu keur maceuh dina TV, masyhur
salaku "penampakkan" tea; sedeng nu kadua teknologi anti teluh.
1. Tekni Anyar "Penampakkan"
Saminggu ka tukang, keur di jajalaneun ka Bandung-keun dina kareta
api, si kuring wawawuhan jeung hiji nonoman padamel hiji bank di
Jakarta. Mimiti na mah biasa bae, di restorasi KA anu sok dijadikeun
tempat miceuh kabosen di jajalaneun bari ngopi jeung ngaroko teh,
sok pirajeunan ngobrol. Anu diajak ngobrol teh tara dipilah-pilah,
saha bae anu aya di dinya, ti mimiti padamel restorasi, patugas KA
sejenna oge sasama panumpang anu los ka dinya kalawan maksud anu
sigana mah teu pati beda jeung sorangan. Diantara anu miluan ngobrol
anu teu puguh alang-ujurna teh nya nonoman padamel bank anu kasebut
di luhur, sebat bae namina Hadi.
Obrolan teh mimitina mah biasa bae soal politik, khususna pamilihan
presiden tea. Teuing kumaha mimitina, lila-lila jejer obrolan teh
los kana soal penampakkan jeung dunia gaib. Kang Hadi, anu nalika
obrolan masih soal politik jeung kahirupan sapopoe mah teu pati
ngahaminan, ujug-ujug muka cariosan. Saur anjeunna, kapayun, cara-
cara "penampakkan" dina acara "uji nyali", "dunia lain", jeung
sabangsana anu ayeuna rame di tv, baris robah "format" pintonanna.
Kang Hadi ngajelaskeun leuwih jauh waktu ditanya ngeunaan non anu
dimaksud robah format pintonan teh, yen engke mah anu mawa eta acara
anu kasebut di luhur heunteu kudu hese cape neangan tempat anu
angker pikeun ngintip "penampakkan". Anu jadi marga lantaran teu aya
sanes, yen "penampakkan" bisa dilakukeun dimana bae, boh di nu
angker atawa di nu rame, asal aya bae jalmina anu tiasa
ngalakukeunna. "...jeung, ayeuna geus aya jalmi-jalmi anu bisa
ngalakukeun sarupa kitu teh", saur anjeuna nandeskeun.
Barang miresep katerangan Kang Hadi sarupa kitu, atuh rob bae anu
ngawarangkong aya kana limaaanna di restorasi teh kabeh manco ka
anjeunna, miharep dadaran leuwih jauh ti anjeunna ngeunaan "tukang
penampakkan". "Dongeng" Kang Hadi saterasna teh ringkesna kieu:
"Ayeuna geus aya jelema-jelama, malah kuring wawuh pisan ka
aranjeunna jeung geus nyaksina kalawan direkam (rekamanna aya di
rorompok) gawe aranjeunna, anu tiasa ngahadirkeun makhluk-makhluk
gaib. Enya makhluk-makhluk sarupaning kuntilanak, genderuwo, jin,
jeung sabangsana.
Carana, urang kumpul di hiji tempat, anu sayogi nyaksian ngariung,
terus eta jalma pinter teh nyieun wates sarupa pakalangan, terus
wajah urang diusap atawa salaha sahiji anggota badan urang ditepak
ku anjeunna. Teu lila urang baris nyaksian eta makhluk-makhluk gaib
anu disebut di luhur.
Basa kuring nyaksian hiji acara penampakkan sarupa kitu, ey mani
muringkak bulu punduk. Enya atuda atra katingal, kumaha anu disebut
kunti, kumaha anu disebut genderuwo, jsb. Salila acara eta
dilaksanakeun teh anu miluan nyaksian teu meunang kaluar tina
pakalangan anu geus ditangtukeun, sabab bisi jadi sasaran "balas
dendam" makhluk ghaib anu di luar, anu kasedot ku tanaga jalmi
pinter tadi, tapi teu bisa asup. Teu bisa asupna teh bisa kulantaran
tanaga jalmi pinter teu cukup, da geus loba teuing dipake ngasupkeun
baturna ka pakalangan, bisa oge kulantaran tempat pakalangan teh
pinuh teuing. Sabenerna, maranehna teh eraan jeung arembungeun
nembongan ka manusa, ngan kakuatan ti jelema pinter anu ngondang teu
bisa kaungkulan ku maranehna". Kitu ceuk Kang Hadi dina dadaranna
panjangna ngeunaan teknik anyar penampakkan.
"Kahareup, acara-acara sarupa kitu baris tambah maceuh, sabab kacida
matak pikauruyeunna pikeun ahli acara pintonan tv mah. Rekaman
acara "teknik anyar penampakkan" sarupi anu aya dina CD di rorompok,
sigana moal lila deui baris kasaksian ku urang dina tv", ceuk Kang
Hadi mungkas caritana.
Samemeh papisah di statsiun Bandung, si kuring kungsi tetelepek
ngeunaan dimana jeung kumaha carana nyangking kamampuan ngondang
makhluk gaib anu dicaritakeun tadi. Anjeunna heunteu tiasa
nerangkeun panjang lebar da puguh samporet ku waktu, ngan ringkesna,
bisa ditalungtik jeung aya metodena. "Mataholangna, urusan ngatur
nafas"!, ceuk Kang Hadi bari ngasongkeun kartu nami jeung terus
gugupay tanda menta papisah.
Sajajalan ti statsiun ka imah, si kuring nginget caritaan Kang Hadi
tadi di KA. Ras inget "dongeng" kiayai ngeunaan jalmi anu
bisa "nembongkeun" naon rupi titingalian ku cara ngusap wajah urang.
Enya, siga riwayat Imam Ja'far anu ngusap raray sahabatna anu harita
eta sahabatna teh keur nyaksian rebuan jama'ah haji thowaf, nyaksian
kalayan gede hate ngarasa loba pisan ummat Islam anu sholeh keur
ngalaksanakeun ibadah haji. Barang satutasna diusap raray, ngadadak
anu katingal noyek keur thowaf sabudeureun ka'bah ku sahabat Imam
Ja'far teh lain manusa, balikta rupa-rupa sasatoan kayaning monyet,
(punten) anjing, babi, ajag, jeung sabangsana. Wallohu 'alam.
2. Teknologi Anti Teluh
Anu ieu mah minangka ringkesan pintonan acara salah sahiji statsiun
tv tadi peuting, ngeunaan salah saurang sarjana ti kampus cap gajah
anu nyiptakeun alat "penangkal" teluh. Eta alat geus dipake ku salah
saurang pangusaha garmen kalawan hasil. Engke deui bae atuh
dongengna mah, bisi kapanjangan teuing. Anu jelas, sakumaha tadi
peuting dina tv, eta alat teh lain alat samanea jeung lain ti dukun,
tapi hasil ngamekarkeun pangaweruh jeung teknologi anu ngawengku
rumus "Relativitas Einstesin" sagala.
Cag.
Baktosna,
manAR
Komunitas UrangSunda --> http://www.UrangSunda.or.id
Komunitas UrangSunda --> http://www.UrangSunda.or.id
Yahoo! Groups Sponsor
ADVERTISEMENT
Yahoo! Groups Links
- To visit your group on the web, go to:
http://groups.yahoo.com/group/urangsunda/
- To unsubscribe from this group, send an email to:
[EMAIL PROTECTED]
- Your use of Yahoo! Groups is subject to the Yahoo! Terms of Service.
