Sok remen menta tulisan ka balad-balad keur ngeusian Cupumanik, boh langsung bari ngawangkong, boh ku SMS atawa ku email. Enya menta teh sangkan inyana nulis ku basa Sunda. Jawabanana mindeng nyebutkeun "Teu bisa ari kudu nyieun carpon, sajak atawa ngeunaan basa Sunda mah". Meunang jawaban kitu teh kuring sok rada ngajenghok, na da nu dipenta teh lain carpon, sajak atawa ngeunaan basa. Duka teuing ieu teh, naha geus jadi cap, ciri, stigma, yen media citak basa Sunda mah nu digegedekeun teh Carpon jeung Sajak (sastra, dina harti nu heureut) atuh kadituna mindeng ngadenge mun maca majalah basa Sunda nu diteangan mimiti teh carita humorna, tuluy carpon. Naha bet jadi ngaheureutan kieu nya..? Boa boa......... (titik-titiknana mah moal dieusian bisi kabadi he he) Cupumanik ge keur ngawadahan kahayang eta, nyadiakeun rohang carpon, sajak, jeung landong baeud malah dina rohang carpon mah unggal medal sok aya carpon tarjamah, maksudna mah sangkan aya babandingan antara kamekaran carpon Sunda jeung carpon mancanagara. Teu cukup ku kitu, dina Cupumanik ge aya rohang kritik Sastra, gawe bareng jeung Prodi Sastra Sunda Unpad, tujuanana mah karya sastra nu dimuat sok dianalisis ku ahlina sangkan aya kamajuan keur nu nulisna jeung nu macana. Pasualan basa keur kuring mah pasualan nu meh rengse, maksud teh karya budaya Sunda pangajegna, nu pang-ngajenglengna nyaeta basa, kari ngamumulena ku dipake boh lisan boh tulisan. Kudu aya kasaimbangan antara lisan jeung tulisan, nya karya tulis ieu diwadahan diantarana ku majalah Cupumanik.
Kukituna diantos seratan ti balarea, mangga bade perkawis naon bae ge. Upamina ti iraha urang Sunda wanoh kana logam, kumaha sikep urang Sunda kana waktu, kumaha sikep urang Sunda kana etos kerja (hade gawe), kumaha sikep urang Sunda kana ekonomi, kumaha sikep urang Sunda kana pulitik jste. Atanapi nyerat pangalaman Lalampahan, sim kuring yakin di Kusnet seueur nu kantos nyaba katebihna, boh ka luar Jawa Barat boh ka mancanagara, naon nu katingal nu karaos mangga diserat, aya saena dibandingkeun sareng kahirupan urang Sunda, cohagna mah aya pulunganeunana ku nu sanes. Hal ieu teh aya saena diserat margi cek cenah di Urang Sunda mah teu aya budaya "merantau", nu aya teh mung lalampahan, ameng layaran saur Bujangga Manik mah. Seratan kintun we ka email sim kuring atanapi ka [email protected] ulah kalangkung dilengkepan ku foto, teu kedah panjang seratan teh cekap antawis 5000-6000 karakter+spasi. MSas
