Assalamualaikum w.w. pak Chaidir, Lamo kalamoan ambo mandapek kasan, bahaso walau saluruah urang Minang masih manganuk budaya Minang nan samo [mudah-mudahan], tapi nampak jaleh bahaso pamahaman dan paratian kapado unsur-unsur kebudayaan Minang nan baintikan ABS SBK tu indak samo. Paratikanlah substansi wacana dalam milis Rantau-Net ko. Paliang indak ado duo aliran gadang, 1) nan bataguah ka Islam dan manomorduokan adat [ ambo masuak kalompok iko] dan 2) nan mandaulukan adat daripado Islam. Adolah manarik paratian ambo sacaro khusus bahaso para dunsanak kito nan mandahulukan adat ko umumnyo ingin mambao kito ka zaman saisuak dan raso-rasonyo indak baitu paduli ka masalah nan kito hadoki kini. Kato kunci dari para dunsanak kito hanyo duo sajo: "sako" jo "pusako". "Ko" nan lain indak paranah disingguang, yaitu "manaruko". Jadi nan ciek baorientasi ka muko, dan nan ciek lai baorientasi ka balakang. Mungkin itu nan manyababkan manga indak banyak kamajuan nan kito dapek dalam mambahas ABS SBK ko, yaitu karano karangko referensi dan orientasi sangaik babeda, nan mungkin sakali disababkan karano kapantingan nan memang sangaik babeda. Manuruik panglihatan ambo, supayo wacana kito dapek ditindak lanjuti dan kaputusan dapek diambiak, duo aliran gadang ko paralu distrukturkan, dan sistem pangambilan kaputusan paralu disapakati. misanyo sacaro di-voting, punguik suaro, nak jaleh jantau batinonyo. Karano dalam budaya [baco: adat] Minangkabau indak ado struktur, mako kito paralu marujuk kapado hukum positif nasional, yaitu UU Nomor 32 Tahun 2004 Tantang Pamarentah Daerah, dan paraturan tindak lanjuiknyo, saparati Perda Propinsi dan Perda Kabupaten/Kota. Masalah nan paliang dasar dalam hal iko adolah: dima duduaknyo urang Rantau dalam pamarentahan daerah Sumatera Barat dan dalam perda-perda tu? Bak kato Dunsanak Wisran Hadi -- nan ambo satujui -- dalam adat Minang indak ado tampek untuak urang Rantau, saparati indak adonyo tampek bagi padusi [bacolah disertasi Prof Keebet von Benda-Beckmann ], pengusaha, urang mudo, urang sumando, seniman, budayawan, atau nan manjadi tentara dan polisi. Aratinyo, dalam kanyataan adat Minang banyak sakali mambuang sumber daya manusianyo nan potensial, dan malatakkan saluruh proses pangambilan kaputusan di tangan sakalompok urang sajo. Aratinyo labiah lanjuik, sabananyo sacaro struktural kalimbagoan adat Minangkabau tu samo sakali indak demokratis, tapi dalam istilah kini sabananyo tatanan adat Minangkabau tu adolah oligarkis [diparentah dek sakalompok urang] dan juo gerontokratis [diparentah dek nan gaek-gaek]. Sambia lalu, kan itu nan tajadi dalam kasus pambarian gala 'adat' ka SBY kini. Bara urang bana nan mamutuihkan pambarian gala tu ? Lai ditanyo baliau ka anak kamanakan jo rakyat badarai ? Jadi, supayo ado tampek formal bagi urang Rantau dalam adat Minang, mako adat Minang tu paralu bana direformasi. Dan itu halal, karano dari ampek jinih adat nan alah kito bahas, tigo jinih mambuka pintu untuak parubahan. Soalnyo: sia nan ka mamuloi reformasi adat Minangkabau ko ? Dalam Ranperda tantang Nagari, urang Rantau sacaro pasaorangan bisa ikuik mamiliah di tingkek nagari. Iko alah lumayan, karano alah mangoreksi katantuan adat nan samo sakali indak ma-urangkan kito urang Rantau. kacuali tantunyo urang Rantau nan bagala datuak. Baa tantang kito urang Rantau nan biaso-biaso sajo tapi ingin sato juo babincang-bincang tantang kampuang kito nan jauah di mato tu ? Ado babarapo alternatif: 1) yo jo sakadar mancaliak-caliak dari jauah sajo, sambia manggarutu, karano kito hanyolah mantimun bungkuak nan indak ado posisi struktural dalam adat Minang tu; 2) sasakali sato manyampaikan pandapek sacaro tatulih kalau ado seminar atau lokakarya; 3) kito karang bana buku tantang Minangkabau; 4) kito sampaikan saran pribadi kapado para patinggi Sumbar, mudah-mudahan lai diparatikan; 5) kok ado nan barasaki, bueklah sikolah untuak mandidik generasi mudo Minangkabau Baru, sarupo nan alah dibuek dek Prof Jurnalis Uddin di Solok; dan 6) walau jo ati ibo karano indak diambiak asi, sumbang juolah nagari kito tu, dalam DAMI nan pak Chaidir galorakan kini. Saluruah masalah ko manuruik pandapek ambo pado suatu wakatu paralu kito bahas sacaro mandasar dalam Gebu Minang. nan dalam Mubes V di Sawah Lunto bulan Desember nan lalu alah kito sapakati marupokan 'organisasi payung' para parantau Minang. Tantang Ranperda tentang Nagari nan sadang dibahas kini, dalam panglihatan ambo, lumayan. Wassalam, Saafroedin Bahar ----- Original Message ---- From: chaidir latief <[EMAIL PROTECTED]> To: [email protected] Sent: Friday, September 22, 2006 5:53:56 PM Subject: Re: [EMAIL PROTECTED] Kemiskinan - Model Pengentasan yang Berbasis Nagari
ass ww Iko mengenai perda NAGARI Ternyato sampai kini hanya anda surang sajo nan tertarik Ambo kirim sajo per pos ya Kasi alamatlah Tarimo kasih Ch N Latief Dt Bandaro 78 -------------------------------------------------------------- Website: http://www.rantaunet.org ========================================================= * Berhenti (unsubscribe), berhenti sementara (nomail) dan konfigurasi keanggotaan, silahkan ke: http://rantaunet.org/palanta-setting * Posting dan membaca email lewat web di http://groups.yahoo.com/group/RantauNet/messages dengan tetap harus terdaftar di sini. -------------------------------------------------------------- UNTUK DIPERHATIKAN: - Hapus footer dan bagian yang tidak perlu, jika melakukan Reply - Besar posting maksimum 100 KB - Mengirim attachment ditolak oleh sistem =========================================================
