Boas:
Eu son un programador "da vella escola". Escomencei a traballar con ordenadores (de principio, por hobby) cando os únicos recursos que ofrecían era un monitor de 80x25, un teclado e unha (¡ou dúas!) unidades de diskette (con sorte, un disco duro de 20 ou 40 MB). Despóis de adicarme durante uns 15 anos a facer pequenos programas (ao principio, en BASIC ou dBASE. Máis tarde, nos intres finais, en Delphi para Windows) e a dar algunha que outra clase (de MS-DOS ou de programación en dBase, C, etc.), cambiei de ocupación e estiven durante uns cinco anos sen, prácticamente, tocar un ordenador. Por circunstancias de miña vida, vinme obrigado a voltar a traballar nisto (obrigado é un xeito de dicilo. Un traballo sempre é un traballo pero para mín a Informática é un hobby, ao que lle dediquei moitas máis horas das que as que o traballo en sí requería). Hai diso un pouco máis de tres anos. Durante o tempo que estiven desconectado, o mundo da Informática cambiou horrores: Agora xa non se trata de traballar nun equipo só, nen sequera nunha rede local. Hoxe en día todo está orientado á Web. De xeito que estes tres anos estiven adicado a poñerme ao día, a aprender algunhas cousas novas e outras que coñecía mínimamente de antes: SQL, HTML, Javascript, etc. Agora mesmo, véxome obrigado (en realidade, posto que a Informática é para mín un hobby, véxome obrigado pero é un pracer) por un proxecto que teño entre mans, a estudar PHP. Todos estes campos de estudo, non teñen maior dificultade para mín porque, como xa dixen, eu controlo os ordenadores case dende que funcionaban con diodos e, polo tanto, teño claro cómo traballan, qué poden facer e qué non, e cómo o fan. De feito, agora, xa case teño coñecementos dabondo como para poder desenvolverme e levar a cabo aplicacións na Web. Dende que retomei o tema, o meu interese centrouse (como non podía ser doutro xeito, dadas as miñas ideas de cómo debería funcionar o mundo) nos proxectos de software libre. Instalei Linux no ordenador (eu xa probara Xenix no seu momento), borrei Windows (non o teño instalado nen conto voltar telo) e escomencei a estudar a traballar. Agora que xa teño un mínimo de coñecemento (máis que un mínimo; non aínda, claro está, todo o preciso) e que, por fin, conseguín engancharme á rede, penso que pode ser o momento de tentar colaborar no que eu poda facer. En esencia, a miña colaboración pode consistir en axudar ás traducións das aplicacións de software libre. Nunca estudei inglés (ao cabo, fixen un curso de inglés básico por correspondencia hai uns anos, pero iso é unha tontería ao final) pero, precisamente por terme adicado á Informática cando os ordenadores mostraban as mensaxes de erro en inglés e pola miña afición a tocar a guitarra (fundamentalmente, con cancións de intérpretes de fala inglesa), son capaz de lelo e interpretalo bastante ben, aínda que teño os meus problemas para redactalo (sobre todo, claro está, cando se trata de falalo máis que de escribilo). Tampouco o meu coñecemento do galego é exquisito, do(s) galego(s) normativo(s), aínda que sexa a miña lingua materna (como a de moitos de nós). Considérome totalmente capaz para, coa axuda dun diccionario e, se cadra dalgún traductor, de facer traducións máis ou menos decentes. Dados os meus coñecementos, eu estaría máis capacitado (e estaría máis interesado) para facer traducións de cuestións técnicas (compiladores, páxinas do manual, ...) que de aplicacións de usuario. Conste que, pese a todo, eu estaría disposto a facer ese traballo meramente para contribuir á causa (encantado) porque, no que a mín se refire, estou tan acostumado ver o ordenador en inglés que, paradóxicamente, eu non instalaría esas traducións para mín (tiven a oportunidade de ver funcionar o gcc en castelán e facíaseme rarísimo: "Identificador no definido" en lugar de "Undefined identifier"). Estou, dende os vellos tempos, tan habituado a ver os "aparatos" en inglés que teño configurado ¡o móbil en inglés!. Se pensades que a miña colaboración pode pagar a pena, contactade conmigo en: anxocarrilgonza...@gmail.com Saúdos cordiais. Anxo Carril González