..kito taruihkan...
Kedatangan Muhammad rasulullah ka ateh dunia ko maubah sagalo nan galok
manjadi tarang, nan karuah manjadi janiah, nan kumuah manjadi barasiah,
baitu juo taradok urang padusi. Urang padusi ko diagiah hak-hak nan samo
jo laki-laki kecuali beberapa kasus (dalam kasus mamimpin urang laki-laki
di ateh etc.), bahkan sampai ka kewajiban manuntuik ilimu urang padusi punyo hak
nan samo jo laki-laki. "Utlubul 'ilma fariidhatun 'ala kulli muslim", muslim
dalam arati ko adolah padusi jo laki-laki, di hadits nan lain tasabuik
muslimin wal muslimah. Urang padusi ko di imaik-imaik kan, indak sumbarang
urang buliah mancaliak, indak sumbarang urang buliah malapeh hao nafsunyo.
Ditinggikan harkat dan martabatnyo. Di Minangkabau dilabiahkan, berhak taradok
harato pusako tinggi, urang laki-laki indak. Di Piaman dikayokan jo harato kaum
sahinggo bisa mamiliah laki-laki jo haratonyo. Baitu bana dek nak maangkek
harkat dan martabat urang padusi ko. Ditutuik jo jilbab indak sumbarang kalua
kalau indak jo muhrim. Sabab nan barang nan tabukak ko bantuak barang di kaki
limo, murah se dikaca dek urang dan haragonyo murah pulo, balain jo nan tatutuik
nan basaok dan talatak di etalase, tinggi haragonyo bak kecek rang panggaleh.
Apo nan lah dibaok dek Nabiyullah saw. ditiru pulo dek urang barat, dek rancak
tanampak dan bacubo pulo, sabab nan sabananyo bana di dalam Bibel (Taurat, Zabur
dan Injil dalam ciek buku) nan alah diubah-ubah mereka, iyo buruak bana harago
urang padusi ko (Al-Qur'an indak pernah manyabuik sarupo itu do tu). Katiko
Islam sampai ka Andalusia (Spanyol) dulu, keadaan mereka alah mulai elok. Tapi
dek karano dangki dan Setan ikuik pulo bakarajo, agamo nan lah maubah citra
mereka, keadaan mereka, dimusuhi dan diparangi sampai duo ratuih tahun lamonyo
(Perang Salib), tapi indak juo manang. Dan baru berhasil sasudah urang
Islam mulai mundur dari agamo, mulai lengah dengan datangnyo zaman imperialisme
modern. Tapi nan emansipasi ko lai bapacikkan. Cuma nan namonyo Setan, indak
dapek ditagahkannyo ditaruihkannyo bana, sahinggo kasado alahnyo hak padusi ko
bamintak disamokan jo laki-laki sampai ka pucuak pimpinan, baik di dalam rumah
tanggo atau negara (Cleopatra, Jean d 'arc). Sasudah lahia pernyataan hak azasi
manusia nan persamaan hak ko makin manjadi-jadi dan iko lah jauah dari asa muasa
nyo nan dibaok dek Rasulullah saw. Dek aurat urang laki-laki indak banyak, urang
padusi alah manuntuik pulo aurat sarupo jo laki-laki, alhasil tabukak lah baliak
kasadonyo.
Nan kiniko dikito, caro emansipasi ala barat ko nan batiru. Antah banyak
filem-filem atau banyak nan alah pai ka nagari barat tu sahinggo kato-kato
"Marry me" dari urang laki-laki ka padusi alah manjadi mode pulo (dalam bahaso
japang nyo diterjemahkan "kekkon site kudasai" ha ha ha). Aratinyo indak urang
laki-laki nan mangawini padusi lai doh, alah tabaliak. Antah urang awak (Indo-
nesia) ko nan bodoh atau paniru, atau indak punyo kebanggaan, sado produk barat
tu batiru bulek-bulek. Alah salah kaprah, emansipasi ala barat nan taambiak.
Babuang nan rancak nan dibaok dek Rasulullah saw. Kan iyo sansai awak dinyo tu.
Kasudahannyo, barang nan tatutuik alah tabukak baliak, barang dalam etalase
lah talatak di kaki limo. Kasado-sadonyo manjadi santapan nafsu urang laki-laki.
Al hasil, babaliak baliak ka zaman galok, babaliak baliak ka zaman jahiliah.
Tapi babungkuih jo kemoderenan, jadilah jahiliah modern. Na'udzubillah.
A nan katajadi sasudah iko, wallahu'alam bis sawab.
Sampai siko sajo dulu... kok lah lapeh rangkik-rangkik kito sambuang baliak.
Wabillahi taufiq wal hidayah
Wassalam
Khairi Yusuf
http://lapau.rantaunet.web.id
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
