On Fri, 21 Apr 2000, Dedi N. wrote:
> Batua bana tu Ustadz, kini ko dunia lah wale ko nampak no.
> Kalau dicaliak-caliak kiniko padusi jo laki-laki beda no iyo bisa "buntiang
> + manyusui" sajo. Kalu dari panampilan jo aktivitas indak (banyak) babeda.
>
> Kok laki-laki basirawa panjang nan padusi bantuak tu lo kini sadang mode
> cek-e.
> Kok laki-laki babaju kauih oblong atau t-sirt nan induk-induak pantang lo
> katinggalan.
> Kok laki-laki maisok nan padusi banyak lo nan sato.
>
> Kok padusi basubang, nan jantan adolo basubang.
> Kok padusi barambuk panjang, nan jantan ko sato lo.
> Kok padusi bibia no bagincu, nan jantan mancubo lo.
>
> Dari curito Ustadz dibaruah, tasirat baraso antaro kaum laki-laki jo padusi
> itu indak samo. Kaum laki-laki tu sacaro lahiriah jo sunnatullah sabanano
> ditinggikan sarantiang jo didahulukan salangkah.
Ambo pribadi taruih tarang, sayangnyo masih baraja dan ndak dalam doh soal
agamo. Tapi kalau diliek sacaro perumpamaan pun,
rasonyo kaum padusi nan banyak (muslim), walaupun indak kasadonyo,
tahu baraso Siti Hawa ko diciptakan bukan dari tulang kapalo, makonyo kami
bukan untuak di puja-puja. Bukan pulo dari tulang kaki, wajar kalau kami
ndak rela diinjak-injak atau dipandang hina, tapi dari tulang rusuak,
untuak jadi pendamping.
Nan namonyo pandamping tantu iyo indak ka samo jo nan didampingi. Tapi
bukan berarti nan mendampingi dilarang untuak mengetahui dan dilarang
untuak mampu mangarajokan sesuatu sarupo nan didampingi :-)
Malah indak jarang katiko nan didampingi ragu atau ndak tahu apo nan ka
dilakukan, nan mandampingi ko dapek pangana labiah dulu.
Masalah laki-laki ditinggikan sarantiang, didaulukan salangkah. Rasonyo
urang padusi (minang) nan tahu jo adaik tu indak mamprotes toh. Hanyo
sajo, sapandia-pandia nyo kami urang padusi, tantu indak ka sumbarang sajo
man'treat' urang laki-laki baitu 'hanyo' karano dengan satu alasan, beliau
laki-laki. Tantu kami liek dulu, memang patuik ditinggikan sarantiang atau
indak. Patuik didahulukan salangkah atau indak.
Misalnyo, lah jaleh nan kadituju jalan luruih ka utara, inyo babelok ka
selatan, baa kami ka mandahulukannyo salangkah. Tapi kalau dari sikap dan
perilaku urang laki-laki tu memang lah patuik kami tinggikan sarantiang,
kami dahulukan salangkah. Tanpa dimintak pun, kami urang padusi akan
bersikap demikian.
Jadi siko sabananyo masalahnyo duo arah. Kami urang padusi, dengan segala
kekurangan (dan kelebihan) yang kami miliki, butuah bimbingan dan pimpinan
dari urang laki-laki. Kalau memang kami salah dan indak kami sadari, di
situlah paralunyo urang laki-laki, nan ka manunjuak maajari. Tapi sabalun
manunjuak maajari urang padusi, tantu kami nan diajari maliek dulu, apa
nan maaja, nan mambimbiang, nan mamimpin itu 'capable' atau indak.
urang nyo sendiri 'batua' apo indak, minimal dari suduik pandang nan awam.
> Halko saharusnyo kaum
> padusi harus tahu dan mamakluminyo. Sabanano paralu jo ditanyoan ka kaum
> padusiko apo sabanano nan dikandak-inyo jo emansipasi tu.
Taruih tarang, iyo tagalak sengeng ambo tangah malam buto, mandanga
komentar sanak 'annisa' manjawab tanyo sanak dedi ko,
NOT MUCH....
kato sanak annisa... singkek...
not much yang dikandak-i oleh kaum padusi untuak emansipasi.
Memang batua... sacaro umum, memang nan kami kehendaki ndak macam-macam
doh.
> Sabab sampai kini
> kalau ci caliak diantaro mereka indak satu kato.
Ambo pribadi sebagai urang padusi, rasonyo lah bapetai-petai salero ambo
jo kawan-kawan mandiskusikan masalah emansipasi ko, baiak itu wakatu
menghadiri seminar-seminar induak-induak, atau cuma sambia duduak
parintang wakatu, nan biasonyo frekuensinyo maningkat apolai kalau lah
manjalang peringatan hari 'Ibu' jo hari 'Kartini'.
Masalah indak satu kato tentang emansipasi atau bukan, karano
kadang-kadang malieknyo dari suduik pandang nan ba beda, kamungkinan
babeda pandapek tantu ado, jutaan mah banyaknyo kapalo...
Tapi sapanjang pangamatan dan pangalaman ambo, (apokah di lua konteks
emansipasi nan bana nan datang dari Rasulullah atau bukan), secara
mayoritas, kami sepakat baraso emansipasi di kami berarti kami ingin
diberi kesempatan untuak tahu apo nan kami bisa tahu, diberi
peluang baraja apo nan bisa dipelajari, dan tentu sajo dihargai
berdasarkan kemampuan nan kami miliki, apapun jalan hiduik nan
kami piliah, sapanjang masih dalam 'jalur' nan wajar. (Jalur nan wajar di
siko tantu masih bisa diperdebatkan, bahkan antaro kaum padusi sendiri).
Tapi nan jaleh, kami ingin dihargai sasuai jo kamampuan kami. Kalau memang
kami ingin berkarir di lua rumah, sepanjang kami ndak malupokan posisi
kami sebagai 'Ibu', why not ?
Sebagian urang menganggap itu susah dilakukan sekaligus, kalau ndak buliah
dikatokan mustahil. Tapi kami urang padusi sendiri banyak kok punyo
contoh, pedoman, pengetahuan dan ajaran (agamo maupun umum)
nan bisa kami tiru, baraso banyak induak-induak nan tatap sukses mandidik
anak jadi pintar dan beramal saleh, walaupun induak-induak tu punyo karir
di lua rumah.
Sebaliknyo, kalau seorang padusi mamiliah
jadi ibu rumah tanggo nan ingin total manguruih keluarga dalam rumah, kito
menghargai pilihannyo. Karano emansipasi bukan berarti 'harus' punyo karir
di lua rumah. Emansipasi justru berarti padusi 'merdeka' mamiliah,
indak 'dipaksa' untuak berkarir di lua rumah, juga bukan di pandang
rendah hanyo karano di rumah sajo.
Walaupun dalam kenyataannyo, malah banyak nan bukan 'dipaksa', tapi
'terpaksa'.
Jan lupo, induak-induak karajo di lua rumah pun, kebanyakan mereka bukan
demi 'ambisi', tapi baa supayo paruik anak-anak mereka barisi.
Baitu juo, induak-induak nan di 'rumah sajo' pun jangan dianggap enteng,
24 jam karajo toh ndak putuih-putuih, nan juo mambutuahkan perhatian,
kesabaran, kemampuan dan ilmu nan indak serampangan.
Well, tantu sajo iko bukan bermaksud mengecilkan arti pentingnyo kaum
laki-laki. Bukan...
Logika sederhananyo, ambo katokan si A rancak, bukan berarti ambo
mangatokan B buruak... :-)
> Gara-gara emansipasi kini "nan salah kaprah" kecek Ustadz tu, pangangguran
> maraja lela dimano-mano. Sabab kaum laki-laki nan sahrusnyo batugeh dan
> batangguang jawab dalam mancari rasaki lah dialahan dek kaum padusi.
Kalau iko nan dijadikan alasan, maaf kalau manuruik ambo kurang fair.
(Walaupun ambo ndak tahu manahu saluak baluak ekonomi), tapi ambo raso
dalam urusan karajo, prinsip ekonomi dan 'marketing strategy' balaku.
Mungkin untuak masalah-masalah tertentu ado pengecualian, tapi secara
umum...
Kalau dalam tes seleksi nilai urang laki-laki dapek 8, nilai urang padusi
dapek 6, indak ka bodoh bagai urang perusahaan untuak mamiliah padusi
juo lah...doh. :-)
> Ambo
> bukannyo indak satuju padusi tu ba'ubuddiyah lo tapi kan indak harus
> disaluruah sektor. Jadi hansip,satpam, pulisi, tantara, karajo shift-shiftan
> di pabrik-pabrik, supir oto, operator alat berat, manuruik ambo iko bukan
> karajo padusi. Manjadi dokter, perawat, guru, iko manuruik ambo iko adolah
> lahan nan rancak untuak padusi. Sadangkan nan lain-lain podolah.
Alaaahhh....
Takana di ambo diskusi (sabuik se lah MAOTA) kami induak-induak
di Denpasar babarapo tahun nan lalu. Salah surang kawan maangkek topik
karajo nan cocok untuak laki-laki atau padusi ko. Satu hal nan menarik
manuruik kami (ambo manyabuiknyo paradoks), adolah masalah karajo di sawah
atau di ladang. Kalau urang padusi di kantua-kantua dan ditampek-tampek
lain acok di 'gugat' ndak cocok karajo di sinanlah, maambiak lahan karajo
urang laki-laki lah.
Anehnyo salamo ko 'sa tahu kami', alun ado kami urang padusi
mandanga kaum laki-laki mangatokan hal nan samo untuak pakaro karajo di
ladang jo di sawah. Padohal itu kan juo profesi, mato pencaharian.
Karajo barek balumua luluak di sawah, atau diraguik-raguik duri runciang
dalam parak/ladang.
Alangkah malang nyo (atau kah baruntuang?) urang padusi nan baiak pilihan
sendiri atau tapaso kini manjadi petani, sabab indak pernah di'gugat'
urang doh, baraso karajo model tu adolah milik urang laki-laki. ???????
Sampai diskusi kami berakhir wakatu tu, kami ndak mandapek jawabannyo doh,
baa kok kaum laki-laki ndak manggugat 'hak' nyo tantang petani ko.
Sayang dek peserta 'maota' tu induak-induak sadonyo, jadi kami ndak ado
urang laki-laki untuak referensi tampaek batanyo. Mungkin sanak tahu..?
Baa lah kiro-kiro heh, kok marabo pulo urang kali-laki ko, lalu manggugat,
mulai kini, padusi dilarang karajo di sawah atau di ladang, karano itu
lahan karajo urang laki-laki... jan dirabuik pulo.... :-)
salam jo maaf,
Anak dusun
>
> Wassalam,
> dn
>
http://lapau.rantaunet.web.id
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
