Assalamu'alaikum wr.wb.
Khairi manulih :
Maa Sutan Lembang Alam. Panjang tulisan Sutan dan lamak pulo untuak dibaco.
Cuma ado nan paralu ambo bisiakkan ka Sutan. Kalau Sutan bakacomato jo sejarah, dan
bahkan kalau Sutan mamakai pulo kacomato gaya barat, kajadian "Fitnah Al- Qubra" maso
Ali Karamallahu wajhah tu iyo sarupo itu bantuaknyo tu mah.
Cuma kalau Sutan lai namuah, cubo tuka kacomato Sutan jo kacomato Islam.
(ambo)
Insya Allah kacomato ambo kacomato Islam. Ambo jauh dari mangecekan bahaso Ali bin Abu
Thalib tidak mampu dan indaklah ambo ingin marandahan maruah baliau. Nan ambo kecekan
sakali lai fakta, lain tidak. Alah batambah banyak umaik, alah batambah banyak
kainginan, banyak harato gharimah nampak di baitul maal, manjejeh juo salero sabagian
umat Islam wakatu itu, ingin nak sato bakuaso. Memang panjang carito di baliak
parabuikan kakuasaan dek Muawiyah bin Abu Sofyan taradok Ali sabagai khalifah
Rasulullah nan kaampek. Tapi sakali lai nan ambo tunjukan hanyolah a nan tajadi katiko
itu sabagai kanyataan bahaso untuak manyatuan umaik Islam, indak talok dek Ali bin Abu
Thalib lai doh.
Dan sabalun itu cubo Sutan tela'ah baa sabananyo kekalahan perang Uhud manuruik
kacomato Islam. Baa kajadian sabananyo ado gambaran diagiahkan dek Tuhan Allah saketek
dalam Al-Qur'an.
(ambo)
Disisi Allah indak ado nan mangganjia dalam pristiwa di Uhud. Sunatullah itu sadono.
Pangka bala di sinan adolah, harato rampasanlo baliak, bakucak iman sabagian sahabaik,
lupo pitaruah Rasulullah, bakaja kabawah arato rampasan, nampak dek Khalid bin walid
nan katiko itu mamimpin kapia Quraisy (sabalum masuak Islam) bahaso tukang panah lah
indak di bukik Uhud lai, dibaono babaliak pasukan Quraisy, jadi kalah parang
urang-urang nan bariman. Nan labiah tinggi dari itu, iko adolah paringatan dari Allah,
dan dibujuak pulo Rasulullah baliak dek Allah (Q3:140), mangecekan bahaso kalah manang
tu iyo dipagantikan Allah di ateh dunia ko.
Sahinggo Sutan bisa pulo maukua dari nan Sutan sabuik tantang kejadian Ali Karamallahu
wajhah tu.
Nan kaduo, kasimpulan Sutan mangecekkan bahaso indak talok dek sia juo do
managakkan Islam ko sacaro utuh,
(ambo)
Kalimaik ambo indak baranti di sinan, batambah jo "dari contoh sajarah nan alah
dicaliak". Tapi jadih juolah ambo paeloki, mamintak kito ka Allah, mudah-mudahan
didatangkan Allah urang nan talok dino managakan Islamko sampai sakalian urang di
Minangkabau ba Islam sacaro batua manuruik contoh di zaman Rasulullah insya Allah.
Amiin.
rancak dipeloki-i baliak. Sabab iko bisa mam- buek urang salah sangko taradok agamo
ko. Dapek mailangkan sumangaik nan mudo- mudo dan kasudahannyo indak ka mampu
managakkan nan disuruah dek Tuhan Allah (Allah swt.-red). Pikiran Sutan tantu balain
jo pikiran haji-haji tu.
Katiko itu tajadi jalan nan paliang rancak diambiak iyo jalan sarupo itu, bukan dek
karano indak talok. Dalam batindak Sutan paralu mancaliak nan ma skala prioritas nan
paliang tinggi, itu nan harus Sutan pacik.
Kalau iyolah bak kecek Gamut bahaso parang tu maadok-i pulo urang Islam nan lain
(Syi'ah dalam hal iko, cuma di buku sejarah ketek-ketek dulu indak co iko do ko),
(ambo)
Ado bukti sijarah mangatoan memang Islam urang Minang katiko itu labiah dakek jo
Syi'ah (siso-sisoko masih tampak di acara mahoyak tabuik di Piaman). Dan parang Paderi
kan iyo di muloi dek Inyiak-inyiak haji itu, nan mambao faham Wahabi dari Makkah, nan
ingin maluruihan Islam nan ado di Ranah Minang katiko itu. Dan nan dihadoki
baliau-baliau tu bukan urang Islam Syi'ah, tapi golongan adaik nan alun samparono
baagamono lai.
sudah tu ditunggangi dek Ulando, tantu persatuan ummat labiah utamo. Ndak baitu dek
Sutan ?, sasudah tu baru bak kecek Sutan kaji ko mulai dipelok-i dari alih. Mako
wakatu itu kompromi adolah jalan nan paliang rancak diambiak daripado baparang jo anak
kamanakan surang nan kudiannyo dipagunokan dek Ulando. Tapi kok nyampang bajihad
saabih nyao, sampai titiak darah nan paliang
kudian bantuak parang di Aceh, Insya Allah, Allah akan manyampaikan juo mukasuik tu
tumah.
(ambo)
Iko indak jaleh amek di ambo mukasuikno. Kalau Allah bakahandak pasti iyo, tapi Allah
tatap mambalakukan sunahNo. Baliaklolah baliak kapakaro parang Uhud di ateh, meskipun
itu tentara Rasulullah sandiri, kalau ado nan mancubo manyalahi sunatullah, mangecekan
pasti manang karano awak basamo jo Rasulullah, tapi indak dipakai aturan-aturan nan
dilazimkan Allah, dijadikan kalah dek Allah.
Mungkin buliah juo urang manyabuik indak ka dapek doh contohnyo Aceh, tapi nan jaleh,
sampai tahun 45 nan Aceh ko indak baranti baparang dek karano semangat jihad nan
dipunyoi ditambah pulo jo cinto mati sarupo jo cinto ka iduik.
Nan kiniko, sasudah merdeka, kompromi ko iyo rancak indak dibuek lai. Dek
karano alah duo kali kepemimpinan, nan agamo Islam ko makin jauah dari nan sabananyo
bana dipabuek dek urang-urang. Dan alah pulo banyak muncul ulama- ulama nan bantuak
baliang-baliang di ateh bukik, ulama-ulama ABS bahkan AIS, nan mangacaukan agamo ko,
alun peran urang lua nan mangaku Islam lai.
Sakitu dulu Sutan dari ambo.
Wassalam
Khairi Yusuf
(ambo)
Tarimo kasih ateh saran jo karitik.
Wassalamu'alaikum wr.wb.,
Lembang Alam
------------------------------------------------------------
Free Web-email ---> http://mail.rantaunet.web.id
Minangkabau WebPortal ---> http://www.rantaunet.web.id
LAPAU RantauNet di http://lapau.rantaunet.web.id
Isi Database ke anggotaan RantauNet:
http://www.egroups.com/database/rantaunet?method=addRecord&tbl=1
=================================================
WEB-EMAIL GRATIS ... @rantaunet.web.id ---> http://mail.rantaunet.web.id
=================================================
Subscribe - Mendaftar RantauNet Mailing List, kirimkan email
Ke / To: [EMAIL PROTECTED]
Isi email / Messages: subscribe rantau-net email_anda
Unsubscribe - Berhenti menerima RantauNet Mailing List, kirimkan email
Ke / To: [EMAIL PROTECTED]
Isi emai / Messages: unsubscribe rantau-net email_anda
=================================================
WebPage RantauNet http://www.rantaunet.web.id dan Mailing List RantauNet
adalah servis dari EEBNET http://eebnet.com, Airland Groups, USA
=================================================
