[RantauNet] Re:Pemerintah Tipu Masyarakat Sumbar dan Sulsel

[Revrisond Baswir]

Sanak J. Dachtar,   Assallamualaikum Wr. Wb.   Tarimo kasih atas analisa sanak nan sangat tajam atas pemikiran-pemikiran ambo. Kalau ambo cubo ringkehkan, pado dasarnya analisa sanak, sanak bangun badasarkan babarapo aksioma barikuik:   Patamo, dunia kini alah batambah maju. Bahaso kerennya, dunia kini alah mamasuki era global. Tasabab dek itu, soal sia nan punyo perusahaan indak talalu paralu lai. Nan penting adolah soal manfaat perusahaan-perusahaan tu untuk kasajahteraan rakyat banyak.   Kaduo, sanak sangat pacayo bahaso investasi asing adolah jalan kalua nan paliang elok untuk mamakmurkan rakyat Sumbar dan Indonesia. Samakin banyak investasi asing nan mananamkan modalnyo di nagari kito, akan samakin tabuka paluang untuak maningkekkan kemakmuran rakyat.   Ketigo, urang awak, Indonesia atau urang Minang, pado umumnyo indak ado nan barasiah. Nagari awak, Indonesia dan Sumbar, alah lamo terkenal sebagai sarang para koruptor. Ta sabab dek itu, manjua BUMN adolah salah satu caro nan paliang tapek untuk mambarasiahkan nagari ko dari maliang-maliang tu.   Kaampek, manulak mambaia utang akan makin buruak akibatnya bagi rakyat banyak. Nagari kito bisa-bisa diembargo/dikuciakan dek negara-negara maju jo paro investornyo. Tasabab dek itu, tidak bisa tidak, utang lua nagari wajib hukumnyo untuk dibaia.   Kalimo, pemerintah bana-bana tadasak manjua BUMN, karano penerimaan dari pos-pos nan lain indak mancukupi untuak membiayai balanjo negara. Sabalaiaknyo, balanjo negara nan dikaluakan pemerintah tu bana-bana indak bisa diilakkan karano memang sasuai jo tugasnyo sebagai penyalanggaro negara.   Barukik adolah komentar baliak ambo atas pokok-pokok pamikiran nan sanak kamukokakn itu (kalau ambo salah dalam manangkok pikiran sanak, tolong ambo diparingekkan).   Patamo, ambo satuju bahaso dinia kini memang alah mamasuki era global. Tapi paralu sanak patimbangkan, apo bana sasungguhnyo nan dimakasuik sabagai era global tu. Apokah era global itu memang sesuatu nan indak mungkin lai diilakkan dan harus ditarimo apo adonyo. Kalaulah indak bisa diilakkan, sakurang-kurangnyo, apokah indak ado kritik atau perbaikan nan paralu dilakukan untuk membuek globalisasi tu jauah labiah berkeadilan.   Komentar patamo ko paralu ambo kamukokan, karano perlawanan terhadap globalisasi nan didominasi oleh globalisasi keuangan tu, tarutamo justru tajadi di nagari-nagari maju tu sendiri. Sanak tantu tau demo gadang nan mambubarkan pertemuan WTO di Seattle AS pado taun 1999. Manuruik sanak, baa dek saberang tu bana urang Amerika terhadap WTO? Salain tu patuik sanak pertimbangkan pulo, demo gadang manantang Bank Dunia jo IMF di Praha taun 2000, dan demo sarupo di terhadap negara-negara G8 di Itali pado awal taun ko.   Supayo labiah ilmiah (ambo anyo maniru sanak), mungkin ado baiknyo sanak baco pandapek panarimo hadiah nobel taun 2001 nan banamo Joseph Stiglitz. Inyo bukan urang sambarangan, salain panarimo hadian nobel, inyo pernah pulo bakarajo sebagai pajabaik tinggi Bank Dunia. Kalau mantan pajabaik Bank Dunia dan panarimo nobel sajo sangaik berang jo IMF dan Bank Dunia,  sangaik ganjia dek ambo bilo ado urang dari nagari Dunia Katigo justru basikap mamuja-muja globalisasi.   Kaduo, kapacayoan sanak terhadap investor asing ambo raso tarlalu balabiahan. Tampak sakilek perusahaan-perusahaan asing tu memang ancak dan profesional. Bahaso mereka pandai mancari untuang untuak manggadangkan perusahaannyo ambo ndak maragukan hal itu. Soalnyo, bara banyak urang (tarutamo di nagari-nagari dunia katigo), nan manjadi korban dek tingkah laku perusahaan-perusahaan transnasional tu.   Ambo indak usah maambiak contoh nan talalu jauah untuk pakaro nan sederhana ko. Lieklah lah bara gunuang nan abih di Papua untuak mampakayo Freeport, tapi urang Papua tatap sajo iduik sabagai suku tarasiang. Liek pulo keberadaan PT Caltex di Riau. Inyo tumbuah manjadi perusahaan gadang di dunia, tapi suku Sakai tatap sajo indak mandi dan makan ubi kayu.   Mungkin memang bukan urusan inyo mangurusi rakyat Indonesia,sabab alah ado pemerintah nan batugas untuak itu. Tapi satalah ampia satangah abad, baa parusahaan-parusahaan tu tetap sajo indak paduli? Salain tu mungkin patuik pulo ambo sampaiakan, bukankah bank nan manampuang piti hasil korupsi pajabaik-pajabaik Indonesia tu pado umumnyo talatak di sekitar nagari sanak tingga. Kalau memang elok bana kalakuan bank-bank transnasional tu, tantu sapatuiknyo inyo manulak manampuang pitih haram. Tapi nan tajadi salamo ko, ateh namo karahasian bank, bank-bank di sekitar nagari dusanak tingga tu, justru manjadi tampek nan sangaik aman bagi para koruptor di seluruh dunia untuak malatakkan pitinyo.   Pendek kato, kalau untuk kemakmuran rakyat, ambo indak bisa pacayo baitu sajo terhadap paro investor asing tu. Tantu bukan bararti ambo samo sakali anti pado investor asing. Tapi kalau indak pandai-pandai awak mangawasinyo, bisa bangsaik nagari ko dibueknyo. Sakalompok elit tatantu mungkin bisa batambah kayo, tapi rakyat banyak akan tingga manjadi kuli di nagari sendiri. Oto-oto ancak mungkin malinteh dikampuang kito, tapi rakyat banyak indak ba piti untuk menyetopnyo.   Katigo, ambo satuju 100 persen bahaso kabanyakan urang Indonesia memang maliang dan korup. Tapi nan diparalukan untuk mambarasiahkan nagari ko dari maliang-maliang bukanlah dengan menjua BUMN kapado investor asing nan salamo ko alah turuik pulo mampakayo maliang-maliang tu. Nan dibutuhkan untuk mambarasiahkan nagari ko dari maliang-maliang adolah rakyat banyak nan kritis dan sadar akan haknyo sabagai warga negara. Adolah tugas ambo jo sanak dan sanak-sanak nan lain untuk basamo-samo mambangun kesadaran rakyat.   Kalau ambo paturuikan jalan bapikia sanak, ambo kuatir sanak labiah suko nagari ko dijajah dek Balando daripado diurus dek bangso sandiri. Caro bapikia sarupo tu jaleh sangaik absurd. Ah, sia tau sanak manyasa manga nagari ko dulu di jajah dek Balando. Saandainyo Inggris nagari tampek sanak tingga tu nan manjajah nagari ko, tantu nagari kito alah maju pulo sarupo Singapura atau Malaysia. Alun tantu juo sanak, bukankah sanak tau nasib India, Bangladesh, dan Pakistan sampai kini ko.   Tantu lain caritonyo bilo sanak tamasuak kaum elit di tangah-tangah masyarakat. Di nagari miskin atau di nagari tajajah sakali pun, kaum elit akan salalu barado pado posisi nan diuntuangkan. Apo lagi kaum elit nan indak sagan-sagan bakolaborasi jo kaum panjajah. Pajabaiak tinggi atau pagawai menengah perusahaan asing memang jauh labiah elok nasibnyo daripado rakyat kabanyakan. Tapi hal itu biasonyo inyo lakukan sambia mancibiakan keadaan rakyat banyak di sekitarnyo.   Kaampek, katakuitan maminta pemotongan utang adolah suatu mitos nan diciptakan oleh nagari-nagari maju nan urangnyo elok-elok tu untuak menindas negeri-negeri miskin sarupo Indonesia. Ancaman sarupo tu tantu mudah dimangarati, ma lo ado urang nan rela piutangnyo indak dibaia. Tapi sanak, supayo indak tamakan dek mitos, patuiklah kito baraja jo pengalaman nagari-nagari lain atau pangalam nagari awak sendiri da maso nan lalu.   Meksiko adolah contoh salah satu nagari nan terang-terangan manulak mambaia utang. Nan tajadi kamudian bukanlah embargo, tapi negosiasi ulang untuak maringankan baban utang nagari itu. Hal nan sarupo pernah pulo dilakukan dek Argentina. Kalau soal manulak IMF, hal lah dilakukan dek Malaysia, tanyato krisis ekonomi Indonesia di bawah perawatan IMF jauah labiah parah daripado Malaysia. Kalau mancari contoh nan ekstrim, nagari-nagari sarupo Libya, Iran, Cuba adolah contoh babarapo nagari nan barani membebaskan diri dari cengkeraman investor asing. Buktinyo, walau pun indak talalu kakyo, nagari-nagari tu indak pulo jatuah bangsaik sarupo Indonesia.   Apo nan pernah dilakukan Indonesia di maso nan lalu mungkin elok pulo jadi palajaran. Tahun 1974, melalaui peristiwa malari, pernah terjadi demo besar-besaran anti Japang. Buktinyo Japang tetap suko berinvestasi di Indonesia. Kemudian, tahun 1992, Soeharto pernah membubarkan IGGI karano tasingguang dek Meneer Pronk. Tapi kamudian muncul CGI sabagai pangganti IGGI.   Jadi sanak jan lah talampau takuik jo mitos nagari-nagari bekas penjajah tu. Sakali lai, ambo bukan anti nagari asing. Nan paralu kito perjuangkan basamo-samo adolah adonyo hubungan timba baliak nan labiah berkeadilan secara internasional. Kalau Bank Dunia alah mangakui bahaso 30 persen utangnyo indak dinikmati oleh rakyat, samantoro inyo nan salamo 30 taun nan lalu taruih manaruih maagiah utang ka rezim Soeharto, tantu indak ado salahnyo awak mancubo maminta tanggung jawabnyo untuak turuik maringankan baban utang kito. Paralu ambo tambahkan, baru-baru ko duo negara (AS jo Jerman) alah menawarkan suatu caro pangurangan utang dalam bantuak debt to nature swap terhadap Indonesia. Mungkin sanak bisa mambantu malobi pemerintah Inggris untuk malakukan hal sarupo.   Tarakhir atau kalimo, di nagari korup ko, kekurangan pitih nan dialami pemerintah paralu dikritisi sacaro tajam. Apokah pitih tu bana nan ndak ado, ataukah pengelolaannyolah nan salah. Manuruik itungan ambo, tingkat kebocoran penerimaan negara ampia mancapai 30 persen setiap tahunnyo. Demikian pulo tingkat kebocoran pado sisi balanjo. Bilo ditambah jo piti sogok nan sacaro langsuang dibaiakan dek rakyat, yang kiro-kiro bajumlah sekitar 30 persen pulo dari volume APBN, mako volume binis korupsi di negeri kito ko ampia samo gadangnya jo volume APBN setiap tahunnyo.   Ta sabab dek itu sanak, ambo khawatir, privatisasi BUMN nan tanpa Undang-undang tu, sabananyo samo sakali bukan untuk mambaia gaji pagawai, atau untuk maagiah makan kaum miskin, tapi samato-mato untuak mambia angsuran pokok jo bungo utang haram, atau untuak manutuik kakurangan APBN karano di korupsi dek pajabaik-pajabaiknyo. Pandapek sanak dalam hal iko tampak agak ambigu de ambo: "BUMN paralu dijua karano inyo manjadi sapi parah dek paro pajabek tinggi negara. Tapi piti hasil manjua BUMN tu di paralukan bana dek pajabek-pajabek panjarah BUMN tu untuk mambaia gaji pagawai nagari." Kurang jaleh dek ambo sia sabananyo nan sanak tuduah sabagai maliang di nagari kito ko?   Baitulah sanak. Rasonyo komentar ambo alah talampau panjang. Samo sakali indak ado makasuik ambo untuk melontarkan sebuah pemikiran nan basifat mambaliak logika, apo lai nan basifat anti logika. Nan ambo lakukan sabananyo adolah mampatanyokan baliak bangunan-bangunan logika atau kepercayaan-kepercayaan umum, nan biasonyo alah jarang dipatanyokan urang soal salah atau bananyo. Tasabab dek itu, apo nan ambo sampaikan indak ado nan basifat arago mati, tapi tabuka untuk dikritisi dan dikaji ulang. Nan penting bagi ambo, sarupo nan sanak lakukan, adolah dilakukannyo proses pengkritisan atau pengkajian ulang tu sacaro basungguah-sungguah. Jaan talampau capek sampai pado kasimpulan.   Ambo bana-bana mangucapkan tarimo kasih karano sanak alah bajaso mamanciang ambo untuak mengkritisi dan mangkaji ulang pikiran-pikiran ambo sendiri. Talabiah, mungkin satalah 20 tahun, iko adolah tulisan ambo nan patamo nan ambo buek dalam bahaso Minang. Mudah-mudah bahaso ambo lai masih bisa sanak pahami. Akhirul kalam, kalau ado salah-salah ambo manangkok pikiran sanak, sakalai lai ambo mint maaf. Mudah-mudahan diskusi kito ko lai ado manfaatnyo.   Wassalamualaikum Wr. Wb.   Revrisond Baswir