Assalamu’alaikum wr.wb., Dek kapatangko ambo pulang kampuang, dek nampak, dek basuo nan paralu disampaikan mako ambo cubo manyampaikan di siko. Babarapo wakatu nan lapeh awak badiskusi pakaro pangambangan pariwisata di nagari awak Minangkabau sabagai alternatif nan sangaik mungkin untuak mamajukan ekonomi masyarakaik. Pakaro pambenahan nan paralu dikarajoan, sarupo sarana jo prasarana. Pakaro mampaeloki tampek-tampek nan bisa dijadikan objek pariwisata.
Nampakno iyo bana dari level nan paliang awal awak musti mamuloi. Iko contoh sederhana. Dek tagageh katiko turun di Tabiang, ambo langsuang mamasan taksi untuak ka Bukiktinggi. Dek patugas taksi ambo diagiah kuricih nan barisi informasi nomor oto sarato ongkoih nan musti dibayia. Tasurek ongkos Rp 110,000,- nan dibayia nanti ka supir oto kalau awak alah sampai di tampek tujuan. Ambo yakin, ongkosko adolah ongkos nan alah di sasuaikan jo kanaikan harago minyak/bensin. Oto taksino sandiri adolah model ‘Ford’ nan alah tuo, kanalpot lapeh sainggo suarono sabana mamakak. Jandela indak ditutuik. AC indak diiduikan. Katiko ambo kecekan tolong iduikan AC (pukuah sambilan tu alah taraso angek di Padang), baa kecek supir ototu, “indak bisa pak, kalau diiduikan AC indak talok di ampere oto”. Raso-rasono itu hanyolah aka buluih sajo dek supirtu. Di Jakarta masih banyak taksi “Ford” ko ilia-mudiak. Kalau indak diiduikan AC tantu indak amuah urang naiak. Akal-akalan sarupo iko tantu paralu bana dikamehi. Kalau basuo jo urang asiang, jo tamu nan datang dari lua, lah langsuang buruak ponten nagari Minangkabau. Pakaro indak amuah maiduikan AC otoko nampakno alah ‘kasapakatan’ basamo diantaro supir-supir taksi di nagari awak. Katiko ambo kabaliak, ambo ambiak taksi Bukiktinggi untuak ma-antaan ka Tabiang. Adiak ambo nan pai mancarian. Aragono ba-ago-ago, indak pakai argometer doh. Kecek ambo bialah, kan untuak kalua kota. Disapakatilah arago Rp 85,000.- Dalam hati ambo agak heran, apokoh dek karano disasak-an bana dek adiak ambo mangko amuahno jo arago sakitu? Sabanano kok dimintakno labiah pado itupun rasono indak baa di ambo doh. Dek indak tagageh bana, ari lai lapang, jalan lai lancar pulo, taragak juo ati nak singgah di Sate Mak Syukur di Padang Panjang, sakalian baranti sumbayang luhua. Katiko diajak sumbayang, mungkin dino ari masih panjang, indak sato no doh, tapi makan sate lai amuah no sato. Nan ka jadi curito, katiko ambo agiahan pitih seo oto di Padang, nan saharusno ado baliakno, a kecek supir tu, “lah pas se sakiko ko pak. Apak tadi tu manyasak-nyasak bana mangko awak kecekan se jadih tadi tu”. Ambo indak amuah basoal jawab pakaro pitih sakitu doh, wajar sajo kok di ambiakno. Sabanano tantu labiah afdal kalau ambo nan maagiahan sarilah hati ambo. Hanyo jadi catatan di hati ambo. Dek pitih, ilang amanah. Wassalamu’alaikum wr.wb., Lembang Alam __________________________________________________ Do You Yahoo!? Yahoo! - Official partner of 2002 FIFA World Cup http://fifaworldcup.yahoo.com RantauNet http://www.rantaunet.com Isikan data keanggotaan anda di http://www.rantaunet.com/register.php3 =============================================== Mendaftar atau berhenti menerima RantauNet Mailing List di: http://www.rantaunet.com/subscribe.php3 ATAU Kirimkan email Ke/To: [EMAIL PROTECTED] Isi email/Messages, ketik pada baris/kolom pertama: -mendaftar--> subscribe rantau-net [email_anda] -berhenti----> unsubscribe rantau-net [email_anda] Keterangan: [email_anda] = isikan alamat email anda tanpa tanda kurung ===============================================