Waalaikumsalam w.w. Sanak Fitr Tanjuang jo para sanak sa palanta, Sayang buku ambo tu alun ado versi e-book-nyo lai. Tapi bagian-bagian dari pandapek ambo nan ado dalam buku tu alah ambo tampilkan dalam bamacam-macam posting di RN ko. Saparati juo jo pangalaman Sanak Fitr Tanjuang, pangalaman ambo jo wujud adat Minangkabau dalam kenyataannyo tu yo indak baitu nyaman, tautamo manganai konsep punah nan dahulu sabana mambabani pikiran Ayah ambo almarhum, walaupun konsep tu indak sasuai jo ajaran Islam tantang nasab. Bagi ambo surang, karano ambo sapanuahnyo manganuik ajaran Islam tantang nasab, ambo bukan sajo indak talalu paduli jo soal punah mamunah ko, tapi juo jo soal sako dan pusako nan takaik jo itu. Ambo maaja anak-anak ambo untuak 'manaruko' dan marintis samacam sahala harajoan-nyo surang-surang, dan jan bagantuang ka masalah warih-mawarih nan manjadi sumber persengketaan bakapanjangan di kalangan urang awak ko. Untuak sanak kito nan lain tantu tasarah ka masiang-masiang. Hanyo ambo sabana kasihan ka Ayah ambo almarhum, nan sacaro mental sabana menderita mangana akan habihnyo katurunan jurai baliau manuruik adat. Kini tanyato harato pusako jurai baliau tu dipasokokkan dek kaum baliau dan kudian ko dijua habih dek datuak baliau dari suku Koto. Nah. Homo homini lupus, kato urang. Manuruik pandapek ambo, rasonyo paralu bana landasan filsafat, mekanisme, sarato prosedur pelaksanaan sako jo pusako ko dikaji bana-bana, bukan hanyo sakadar untuak dibagi, tapi juo untuak dikambangkan dan dimanfaatkan basamo sacaro dinamis. Pangkajian tu bukan hanyo paralu dilakukan kalangan para niniak mamak, alim ulama, cadiak pandai, dan bundo kanduang sajo, tapi juo di kalangan nan mudo-mudo nan kini alah banyak nan tapalajar. Penelitian dan pengkajian tu paralu dilakukan sacaro mendalam khususnyo taradok baitu banyak kasus-kasus nan tajadi, dihadokkan pado tantangan nan dihadoki masyarakat Minangkabau dalam maso datang. Mancari kasus kan indak sulik bana, salain mampalajari pakaro-pakaro nan bajibun di pangadilan, juo banyak di arsip berita media massa di Sumbar. Salain itu juo ado kritik-kritik sosial taradok adat dan kaum adat, sajak dari Gerakan Paderi, taruih ka Syech Achmad Chatib al Minangkabauwi, taruih pulo ka rangkaian pengarang Pujangga Baru, sampai ka kito-kito kini nan mancaliak dan marasokan adonyo masalah dalam adat Minangkabau tu, nan babedo antaro papatah-patitih jo kaadaan nyato di lapangan. Babarapo netters di RN ko alah manyampaikan pangalamannyo surang-surang tantang masalah ko, tentu ado nan nyaman-nyaman sajo, tapi indak kalah banyaknyo pengalaman nan menyeramkan sarupo nan Sanak Fitr Tanjuang alami. Masalah dasarnyo adolah: 1) harato pusako tu indak batambah, sadangkan katurunan bakambang biak, tantu basisalak kasudahannyo; 2) adat kito indak mandorong kagiatan manaruko lahan baru, sarupo nan diajakan dek adat Batak jo ajaran sahala harajoan, tapi hanyo baputa-puta di soal mambagi harato pusako, nan makin lamo makin ketek tu; 3) tanyato harato pusako itu sandiri sacaro diam-diam alah banyak dipajua-balikan, mungkin indak jo caro nan sasuai jo adat, tapi jo macam-macam aka dan tricks. Susahnyo: indak banyak bana niniak mamak, alim ulama, cadiak pandai dan anak mudo Minang nan basalero maadokan penelitian jo pengkajian sacaro mandalam manganai masalah sako jo pusako ko, sahinggo wacana manganai masalah sako jo pusako ko tapaso baputa-puta di papatah jo patitih sajo, indak mainjak bumi. [ Sekedar catatan, baru-baru ko ambo mandapek buku ketek di kios buku Upi Titi Sundari di Hypermart Kelapa Gading, Jakarta, nan bajudul "Rancak di Labuah". Iyo tabasuik galak ambo mambaco, karano basamo jo adonyo anam urang sumando, tanyato ado pulo anam macam pulo panghulu tu. Inti pasannyo: dari anam macam urang sumando dan anam macam panghulu tu hanyo satu macam nan elok. Jadi 85% buruak, 15% elok. Patuiklah co itu jadinyo nagari kito tu]. Akhirulkalam, masalah sako jo pusako ko sabananyo kan masalah para sanak kito di Ranah, indak lai masalah kito di Rantau. Baa juo, kito di Rantau kan alah 'manaruko nagari baru', dan sadar atau indak sadar alah mangambangkan ABS SBK versi Rantau nan labiah barek ka Islam daripado ka adat. Kalau para sanak kito di Ranah labiah suko anok-anok sajo manangguangkan sagalo silang sangketo soal sako pusako tu, yo ka dipangaan lai. Namun, baa juo, suko indak suko, siap indak siap, adat tu alah barubah, sadang barubah, dan akan barubah taruih, dan kama arah parubahannyo banyak saketeknyo bisa kito pakirokan. Syukurnyo, alah ado babarapo penghulu sandiri nan sacaro jujur mangatokan manurunnyo pangaruah adat. Soalnyo ado nan amuah mancaliak kenyataan dan basadio manyusun samacam kabijakan jo strategi nan diparalukan untuak maadoki parubahan tu, dan ado pulo nan suko 'basihanyuik' [maaf istilah ko] sajo. Yo sudahlah kok baitu. Banyak nan lain nan bisa kito karajokan. Wassalam, Saafroedin Bahar (L, 71 th, Jakarta) Alternate e-mail address: [EMAIL PROTECTED]
--- On Sat, 8/2/08, Fitr Tanjuang <[EMAIL PROTECTED]> wrote: From: Fitr Tanjuang <[EMAIL PROTECTED]> Subject: [EMAIL PROTECTED] Re: SATU KASUS LAGI TENTANG GOYAHNYA TANGGA MENUJU MUFAKAT To: [email protected] Date: Saturday, August 2, 2008, 6:01 PM AslmWrWb Sayangnyo ambo lah di US baliak, jadi indak bisa mancari buku pak Saaf doh. Lai adoh di internet atau di blog pak Saaf nan bisa kami baco-baco, Pak? Untuak panambah2 wawasan ambo. Kadang tapikia dek ambo, kalau untuak mancarikan solusi persoalan masyarakat ko, bakumpua nan cadiak pandai sae di ruang tatutuik, sudah tu kalua hasilnyo dalam bentuk buku (buku putih, cetak biru, draft UU) dll, iyo tatingga masyarakat nan jadi objek tujuah/lapan langkah di balakang. Kalaupun hasilnyo ditarimo dek pemerintah, sudah tu dijadikan UU, makin jauah tatingganyo masyarakat ko. Jadinyo katiko kalua peraturannyo, masyarakat ko lah taheran2 sajo. "Aa kecek rang cadiak2 tu, Yuang?"..:) Mungkin ke depan, rakyat paralu dilibatkan sacaro aktif dari awal. Kalau paralu dilomba jo difestivalkan, dipasamalamkan, dirandaikan. Dicari jawaban dari masyarakat itu sendiri dulu. Baru beko diparancak dek nan cadiak pandai. Mungkin indak efektif doh, tapi masyarakat jadi tau dari samulo dan raso memilikinyo adoh. Untuak para politikus, mungkin lah wakatunyo pulo kito pakai caro lobby Yahudi. Kito lah samo tau baa lobby Yahudi di USA, sampai Obama indak barani maangkek kapalo saketeknyo di hadapan mereka doh. Bakaja inyo mengakui Yerussalem ka jadi ibukota Israel, capek2 inyo mangaku indak pernah jadi muslim. Artinyo, sacaro legal kito susun lah pengaruh nan dalam dan kuek ka politikus2 ko. Antah baa caronyo, ambo indak tau doh. Mungkin dalam bentuk dana, pemikiran dll Kok di ambo, rang kampuang ambo nan maju nan ambo sponsori sorang. Syarat nan ambo mintak ciek se nyo, baco saluruah buku Natsir dan buku tentang Natsir dan jadikan teladan dalam bapolitik. Ambo raso rang Minang bisa maniru loby Yahudi ko. Jaan dalam badagang se kito nan gaya Yahudi..:)) Mambali mintak panuah ka ateh, manjua panuah ka bawah. Di ateh maiimpik, dilua manguruang. Pakuak mamakuak saroman nan lah banyak di bahas di milis ko... Wassalam fitr tanjuang lk/33/Albany NY On 8/1/08, Dr.Saafroedin BAHAR <[EMAIL PROTECTED]> wrote: Waalaikumsalam w.w. Sanak Fitr Tanjuang dan para sanak sa palanta, Tarimo kasih ateh panjalasan Sanak manganai kasus nan tajadi dalam kaum Sanak, manambah ciek lai kasus sako jo pusako kito ko. Ambo jo Sanak Ir Mohammad Zulfan Tadjoeddin tahun 2004 nan lalu alah mancubo mambahas masalah adat Minangkabau ko sacaro mandasar dan sacaro komprehensif dalam buku kami baduo nan bajudul "Masih Ada Harapan: Posisi Sebuah Etnik Minoritas dalam Hidup Berbangsa dan Bernegara". Salain mambahas akar masalahnyo -- saparati nan Sanak sabuikkan dalam posting Sanak -- juo ado kami sarankan baa jalan kaluanyo. Saparati dapek diduga, dari kaum penghulu kurang sakali dukungan ka gagasan kami tu. Salah surang malah manabikkan buku nan bajudul "Duabelas Jurus Pertahanan Melawan Serangan" (sic!). Tapi banyak kaum mudo jo kalangan kampus mandukuang pandangan kami tu. Ambo manaruihkan analisa taradok masyarakat hukum adat Minangkabau tu dalam tahun 2007 jo maadokan Semiloka Masyarakat Hukum Adat Minangkabau dari Perspektif Hak Asasi Manusia di Fakultas Hukum Universitas Andalas, Padang, dan awal tahun 2008 di Arsip Nasional Jakarta, tantang Perang Paderi, nan malahiakan ABS SBK. Pak Gubernur alah mambuek sabuah panitia perumus untuak marumuskan ABS SBK tu, nan mancubo mancari rumusan umum tantang norma adat Minangkabau dan agamo Islam. [Draft rumsuan tu alah diserahkan ka Pemerintah Daerah untuak sosialisasinyo labiah lanjuik]. Sapanjang untuak ambo surang sebagai pengamat, rasonyo ambo alah mangaruak sahabih-habih karuak. Alah cukuik rasonyo pamahaman ambo tantang apo bana akar masalah Minangkabau tu, baa mako indak amuah maju-maju. Alah cukuik pulo saran ambo tantang kabijakan apo nan bisa dipiliah untuk mamelokinyo sacaro mendasar. Apo saran ambo ditarimo atau indak, itu soal lain. Tasarah ka baliau-baliau nan manjadi pamimpin di Ranah. Nampak dek ambo, sampai kini samo sakali indak ado garak di Ranah untuk mameloki akar masalah Minangkabau tu. Sadonyo bajalan saparati nan lamo.Business as usual. Karano tu bisa kito pakirokan silang sangketo soal harato pusako akan samakin banyak di maso datang, karano urang kambang sadang tanah kan nan itu-itu juo.. Kasus sangketo Suku Melayu nan hampia badarah-darah ko hanyo salah satu nan mancuat ka pamukoaan, samo jo sangketo bateh nagari di Kabupaten Solok nan alah sampai baka mambaka bagai. Kok memang baitu nan dikehendaki, apo buliah buat. Kini ko nan manjadi paratian ambo sebagai Ketua Dewan Pakar Sekretariat Nasional Masyarakat Hukum Adat --Seknas MHA-- jo kawan-kawan ambo adolah ikuik mamperjuangkan adonyo RUU Tentang Hak Masyarakat Hukum Adat. Mungkin ado manfaatnyo. Wassalam, Saafroedin Bahar (L, 71 th, Jakarta) Alternate e-mail address: [EMAIL PROTECTED] --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
