Sanak Fitr yang ambo hormati. Uraian nan sanak sampaikan iyo nampaknyo analisis obyektif, paralu pulo ditanggapi nak saketek. Masalah-masalah nan disampaikan sabananyo alah lamo dirasokan, dan memang alun nampak lai jalan pamacahannyo. Kok baitu kito baradaik, memang alah tibo pulo di usang-usang dipabaharui, lapuak-lapuak dikajangi. Nan mano ka diparelok, tantu awak manimbang ka barih balabeh (struktur) adat, karono aturan adat pun ado pulo kaedah ushul-nyo. Nan 1, kito memperhatikan bilo ketentuan adat tu dulu tapakai bilo masih banyak urang nan tinggal di kampuang, sahinggo hetongan gadang-ketek pambagian pusako kaum itu disasuaikan jo kondisi anak-kamanakan pado maso itu. Nan mambagi iyo tantu pertimbangan ninik-mamak, khususnyo mamak kapalo warih. Namun tampaknyo pembagian pusako itu bakaturunan, hinggo sampai ka maso kini nan ko. Nan di ambo kini, memang hal itu alah manjadi perhatian, karono perkembangan keturunan itu tarnyato indak samo di satiok paruik. Hinggo ado 2 hal nan dapek dilakukan : partamo, kumbali ka khittah pembagian pusako itu, nan bararti pambagian itu bakaadaan, atau fleksibel sasuai jo kondisi anak-kamanakan. Dengan caro itu niniak-mamak paralo satiok wakatu mengevaluasi penguasaan tanah pusako itu, untuak manjamin kesejahteraan anak kamanakan. Nan kaduo, dapek dimasuakkan unsur baru, yaitu penguasaan kembali lahan tidur. Iko tantu awak manambah saketek ketentuan dalam hukum adat. Mukasuiknyo, lahan-lahan pusako nan alah tabagi ka anak-kamanakan, bilo dalam suatu ukuran wakatu indak ditaruko atau dimanfaatkan oleh kamanakan, maka dapek baliak dalam penguasaan umum pusako. Dari penguasaan baliak itu, kasudahannyo dapek didistribusikan kembali penguasaannyo kapado anak-kamanakan yang mambutuahkan. Ukuran wakatu itu dapek ditantukan basamo, misal 1 generasi (20 tahun), 2 generasi, dst. Dalam kaidah hukum acara adat nan pernah kami lakukan di peradilan adat, hal iko ambo berlakukan untuak tanah sengketa. Jadi perkara nan alah sampai ka KAN, kutiko awak mamulai peradilan dinyatokan bilo tanah itu berada dalam penguasaan Hakim Adat. Nan 3, masalah jual-gadai pusako ado ketentuannyo dalam adat. Kalau ado upayo pengelabuan dalam hal itu, tantu itu adolah permasalahan pidana adat nan harus menjadi perhatian kito basamo. Baitu sanak saketek banyak, talabiah takurang mohon dimaafkan. Wassalam, -datuk endang
--- On Sat, 8/2/08, Fitr Tanjuang <[EMAIL PROTECTED]> wrote: From: Fitr Tanjuang <[EMAIL PROTECTED]> Subject: [EMAIL PROTECTED] Re: SATU KASUS LAGI TENTANG GOYAHNYA TANGGA MENUJU MUFAKAT To: [email protected] Date: Saturday, August 2, 2008, 8:04 PM AslmWrWb Ambo satuju jo masalah nomor 1 jo 3 nan pak Saaf sabuikkan. Lah banyak contohnyo nan nampak langsuang dek ambo. Tapi untuak nomor 2 ambo masiah ragu...:) Untuak nan nomor 1, Katiko padusi lah nikah dan taragak pulo mambuek rumah sorang, lah acok tadanga berita batangka jo sasamo sanak padusinyo. Adoh nan maraso dapek tanah labiah ketek, adoh pulo nan mamparabuikan nan di tapi jalan. Dalam 3, 4 generasi ke depan, persoalan iko akan semakin akut dan mengancam kehidupan bakaum. Soal nomor 3 lah banyak pulo kejadiannyo. Katiko ambo mambali saketek tanah di Aia Pacah Padang tahun 2007, ambo pasankan bana supayo surek2nyo lengkap dan disetujui dek saluruah anggota kaum nan manjua ko. Tapi jawek nan ambo dapek, "Indak paralu ditanyo2 doh, tanah tu lah babagi2 mah." Kenyataan bahaso ambo bisa mambali, manunjuakkan tanah di Minang bisa dijua bali. Dek karano kemungkinan awalnyo tanah pusako, iko subananyo pelanggaran thd adat Minang. Tapi itu lah nan tajadi dan indak kini se mulainyo doh, tapi lah dari dulu. Banyak motivasi manjua tanah kaum. Selain mamak panipu nan pak Saaf sabuikkan, adoh juo nan rela samo rela mambagi2 pusako. Tapi nan dominan manuruik ambo, tanah sengketa ko. Tanah sengketa ko tapaso dijua alasannyo a.l. 1) mamutuih trauma, 2) mambayia biaya pakaro. Kadang pakaro alun salasai, tapi pengacara kedua belah pihak lah siap jo namo2 pambali. Nan nomor 2, rasonyo lai adoh di adat Minang. Kalau indak, tantu nagari Minang ko indak baranjak2 dari sakapiang tanah Parahiyang Gunung Merapi sae doh. Kenyataannyo nagari batambah ka Luhak dan Tigo, mamanuahi Darek sampai manyeba ka Pasisia. Kalau indak adoh konsep manaruko tanah baru tantu indak sampai ka situ kito doh. Niniak ambo sendiri barasa dari Solok Selatan nan manaruko nagari Pauh Padang tu sajak th 1800-an, sahinggo Lubuak Lintah tu lah bisa pulo jadi sawah. Cuman iyo, adoh titiak dimano taputuih tradisi manaruko ko. Mungkin sajak dijajah dek Balando, mungkin juo sajak zaman kemerdekaan. Paralu dicaliak ulang sajarahnyo baliak. Kok kini dihiduikan baliak, apokah masiah tapakai sabagai tanah pusako tinggi? Dulu rantau masih dianggap perpanjangan wilayah ranah, sahinggo kito danga istilah Luhak bapangulu, rantau barajo. Padang pun disabuk sebagai rantau. Tapi kini kok disabuk rantau, iyo lah indak sangkuik manyangkuik jo wilayah Minang doh, tapi sekedar daerah tampek kito jadi TKM (Tenaga Kerja Minang)..:)) Menarik juo masukan pak Saaf supayo transmigrasi dijadikan taruko gaya baru. Tapi baa aplikasinyo, tantu paralu diurai labiah jauah... Wassalam fitr tanjuang lk/33/Albany NY On 8/2/08, Dr.Saafroedin BAHAR <[EMAIL PROTECTED]> wrote: Waalaikumsalam w.w. Sanak Fitr Tanjuang jo para sanak sa palanta, Masalah dasarnyo adolah: 1) harato pusako tu indak batambah, sadangkan katurunan bakambang biak, tantu basisalak kasudahannyo; 2) adat kito indak mandorong kagiatan manaruko lahan baru, sarupo nan diajakan dek adat Batak jo ajaran sahala harajoan, tapi hanyo baputa-puta di soal mambagi harato pusako, nan makin lamo makin ketek tu; 3) tanyato harato pusako ituandiri sacaro diam-diam alah banyak dipajua-balikan, mungkin indak jo caro nan sasuai jo adat, tapi jo macam-macam aka dan tricks. Susahnyo: indak banyak bana niniak mamak, alim ulama, cadiak pandai dan anak mudo Minang nan basalero maadokan penelitian jo pengkajian sacaro mandalam manganai masalah sako jo pusako ko, sahinggo wacana manganai masalah sako jo pusako ko tapaso baputa-puta di papatah jo patitih sajo, indak mainjak bumi. [ Sekedar catatan, baru-baru ko ambo mandapek buku ketek di kios buku Upi Titi Sundari di Hypermart Kelapa Gading, Jakarta, nan bajudul "Rancak di Labuah". Iyo tabasuik galak ambo mambaco, karano basamo jo adonyo anam urang sumando, tanyato ado pulo anam macam pulo panghulu tu. Inti pasannyo: dari anam macam urang sumando dan anam macam panghulu tu hanyo satu macam nan elok. Jadi 85% buruak, 15% elok. Patuiklah co itu jadinyo nagari kito tu]. Wassalam, Saafroedin Bahar (L, 71 th, Jakarta) --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
