Sanak Fitr ysh. Ado babarapo dimensi nan sanak sampaikan, kiro-kiro ambo pajaleh saketek : 1. Tanah nan alah tabagi habis, kiro-kiro sado kaum itu tinggal di ranah, tantu manimbulkan masalah ekonomi baru. Karono tanah alah manjadi barang ekonomi; tarutamo nan tajadi di daerah perkotaan. Nan iko salaruik salamo nanko alun tapacahkan, alun tasadio aturan adatnyo. Elok kasus iko dijadikan bahan kajian oleh Tim Solok itu. 2. Masalah kaum saparuik nan bagak, inyo mahimpik ka subalah, tantu manjadi masalah. Dek karono awak mamiliki raso-pareso, kadang masalah iko tasimpan babarapo generasi. Namun paralu manjadi kasadaran di awak, nan busuak tasimpan akan babaun juo. Indak bisuak, mungkin 10 tahun lagi, atau 100 tahun lagi. Awak mungkin manganiayo generasi di muko awak. Maanyo awak tahu, do'a urang nan taimpik (mustadh'afin) labih dikabulkan Allah; sampik pulo kuburan awak kasudahannyo, baitu pulo anak keturunan nan awak lahirkan. Atau, dapek pulo urang nan taimpik itu suatu maso akan labiah bagak dari awak. Karono dek itu, awak pareso ka diri awak masiang-masiang, mungkin perbuatan awak atau urang gaek-gaek awak ado nan maimpik suatu kaum, kironyo dapek diperbaiki, semampu usaho nan ado. Insya Allah akan ado balasannyo ka awak kelak, baitu kiro-kiro nan ambo danga dari Buya HMA. 3. Masalah rumah balenggek, memang ado situasi tapakso nan dihado'i urang terdahulu. Sabananyo ado aturan khusus untuak pemanfaatan rumah gadang, nan kini rancak mulai awak sigi baliak. Di ambo pun rangkiang alah hilang, namun paralu perlahan-lahan dicari jalan kaluarnyo. Memang ado runcano ekstrim nan tabayang di ambo, misalnyo, dipatenggikan tanah pelataran rumah gadang itu nak 3-4 meter, sahinggo tasadio ruang di bawahnyo nan dapek dimanfaatkan. Namun tantu paralu dana dan wakatu. Kalau di tanah-tanah pusako kaum dilenggekkan bangunan itu, sabananyo alah ado kebutuhan kaidah hukum adat baru. Kalau dalam caro awak di rantau 'strata title' namanyo. Namun untuak hukum adat awak, tantu paralu dikambangkan baru kaidahnyo. Karono tanah dalam pengertian bidang datar sarato nilainyo batambah, baitu bapangaruah terhadap 'nilai pusako' nan dikanduangnyo. Mungkin Tim Solok jo Unand itu dapek mansigi sampai sajauah iko. Sangan itu senyo sanak. Talabiah takurang. wassalam, -datuk endang
--- On Mon, 8/4/08, Fitr Tanjuang <[EMAIL PROTECTED]> wrote: From: Fitr Tanjuang <[EMAIL PROTECTED]> Subject: [EMAIL PROTECTED] Re: SATU KASUS LAGI TENTANG GOYAHNYA TANGGA MENUJU MUFAKAT To: [email protected] Date: Monday, August 4, 2008, 7:34 AM AslmWrWb Datuak Endang nan ambo hormati pulo. Kalau masih adoh lahan tidur, berarti lai masiah "aman" kaum itu. Tingga dimufakatkan sajo baa pengelolaannyo. Nan ambo tangkok dari kekhawatiran pak Saaf dan nan ambo caliak adolah kalau saluruah tanah kaum tu lah tabagi rato untuak rumah padusi2 nan alah manikah. Jadi konteksnyo kalau lah indak adoh tanah kosong lai. Kalau kaum tu bagak, indak baagamo, dibeking pulo dek tantara sarato dukun, karajonyo sudah tu marampok tanah urang sabalah lai. Tapi kok lai baagamo jo bapandidikan, jalan ka rantau nan nyo cari. Dan biasonyo, kalau lah sanang di rantau, banyak nan lapeh dari kaum, indak paduli jo persoalan kaum, dll efek nagatifnyo (kecuali anggota RantauNet ko..:)) Antah kok dijadikan balenggek ka ateh rumah2 padusi tu. Kok iyo baitu, indak bagonjoang di ateh rumah adat kito lai doh, tapi bagonjoang di dindiang..hehe Soalnyo, atok harus dibuek data untuk siap dipatingkekan..:)) Ambo baradiak kakak serius mamikiakan tanah kosong kaum kami untuak dijadikan bisnis properti ko. Dibuek samacam apartemen tapi harago tajangkau dek urang kampuang lah. Saparo kamar/rumah disewakan (indak dijua doh) untuak jadi penghasilan kaum, dan katiko adoh padusi nan manikah, tingga mamakai se lai ciek kamar/rumah nan alah adoh dalam kompleks apartemen tu. Iko dek karano lah susah mancari urang nan namuah ka sawah, sahinggo labiah banyak basewakan juo. Tapi untuak daerah subur, rancak malah disewakan untuak pertanian/perkebunan skala besar. Jadi tagantuang kondisi tanah masiang2. Kami pun indak mamakai sistem patigan niniak mamak lai doh. Kok adoh pemasukan kaum, prioritasnyo untuak sakolah jo modal usaho anak kamanakan. Tapi usaho properti ko masiah angan-angan sajo baru, bamimpi sadang tajago..:)) Kalau adoh pengusaha properti di milis ko nan tertarik, buliah juo kito bakarajosamo. Kalau soal manjua bali tanah pusako ko, iyo lah saja dulu. Jadi lah banyak tanah tu nan pindah tangan labiah dari sakali. Makonyo kalau di daerah kota indak mungkin lai baliak ka nagari... Wassalam fitr tanjuang lk/33/Albany NY On 8/3/08, Datuk Endang <[EMAIL PROTECTED]> wrote: Sanak Fitr yang ambo hormati. Uraian nan sanak sampaikan iyo nampaknyo analisis obyektif, paralu pulo ditanggapi nak saketek. Masalah-masalah nan disampaikan sabananyo alah lamo dirasokan, dan memang alun nampak lai jalan pamacahannyo. Kok baitu kito baradaik, memang alah tibo pulo di usang-usang dipabaharui, lapuak-lapuak dikajangi. Nan mano ka diparelok, tantu awak manimbang ka barih balabeh (struktur) adat, karono aturan adat pun ado pulo kaedah ushul-nyo. Nan 1, kito memperhatikan bilo ketentuan adat tu dulu tapakai bilo masih banyak urang nan tinggal di kampuang, sahinggo hetongan gadang-ketek pambagian pusako kaum itu disasuaikan jo kondisi anak-kamanakan pado maso itu. Nan mambagi iyo tantu pertimbangan ninik-mamak, khususnyo mamak kapalo warih. Namun tampaknyo pembagian pusako itu bakaturunan, hinggo sampai ka maso kini nan ko. Nan di ambo kini, memang hal itu alah manjadi perhatian, karono perkembangan keturunan itu tarnyato indak samo di satiok paruik. Hinggo ado 2 hal nan dapek dilakukan : partamo, kumbali ka khittah pembagian pusako itu, nan bararti pambagian itu bakaadaan, atau fleksibel sasuai jo kondisi anak-kamanakan. Dengan caro itu niniak-mamak paralo satiok wakatu mengevaluasi penguasaan tanah pusako itu, untuak manjamin kesejahteraan anak kamanakan. Nan kaduo, dapek dimasuakkan unsur baru, yaitu penguasaan kembali lahan tidur. Iko tantu awak manambah saketek ketentuan dalam hukum adat. Mukasuiknyo, lahan-lahan pusako nan alah tabagi ka anak-kamanakan, bilo dalam suatu ukuran wakatu indak ditaruko atau dimanfaatkan oleh kamanakan, maka dapek baliak dalam penguasaan umum pusako. Dari penguasaan baliak itu, kasudahannyo dapek didistribusikan kembali penguasaannyo kapado anak-kamanakan yang mambutuahkan. Ukuran wakatu itu dapek ditantukan basamo, misal 1 generasi (20 tahun), 2 generasi, dst. Dalam kaidah hukum acara adat nan pernah kami lakukan di peradilan adat, hal iko ambo berlakukan untuak tanah sengketa. Jadi perkara nan alah sampai ka KAN, kutiko awak mamulai peradilan dinyatokan bilo tanah itu berada dalam penguasaan Hakim Adat. Nan 3, masalah jual-gadai pusako ado ketentuannyo dalam adat. Kalau ado upayo pengelabuan dalam hal itu, tantu itu adolah permasalahan pidana adat nan harus menjadi perhatian kito basamo. Baitu sanak saketek banyak, talabiah takurang mohon dimaafkan. Wassalam, -datuk endang --~--~---------~--~----~------------~-------~--~----~ =============================================================== UNTUK DIPERHATIKAN: - Wajib mematuhi Peraturan Palanta RantauNet, mohon dibaca & dipahami! Lihat di http://groups.google.com/group/RantauNet/web/peraturan-rantaunet - Tulis Nama, Umur & Lokasi anda pada setiap posting - Dilarang mengirim email attachment! Tawarkan kepada yg berminat & kirim melalui jalur pribadi - Dilarang posting email besar dari >200KB. Jika melanggar akan dimoderasi atau dibanned - Hapus footer & bagian tdk perlu dalam melakukan reply - Jangan menggunakan reply utk topik/subjek baru =============================================================== Berhenti, kirim email kosong ke: [EMAIL PROTECTED] Daftarkan email anda yg terdaftar pada Google Account di: https://www.google.com/accounts/NewAccount?hl=id Untuk dpt melakukan konfigurasi keanggotaan di: http://groups.google.com/group/RantauNet/subscribe =============================================================== -~----------~----~----~----~------~----~------~--~---
