SAMBA LADO SEBUAH PUSAKA KULINER MINANG
By :Jepe
Ateh namo urang minang kok ndak
basamba lado atau ndak balado makan sahari-harinyo namuah uring-uringan jo
senewen (apo yo bahaso minang tulennyo) tingkahnyo kamakan bisa heboh didalam
rumah dan dineja makan, “baa ko indak balado makan” kecuali urang nan sadang sakik atau bapantang makan
lado samantaro iyo basaba sajo , walau nan sakik bin damam ko urang minang juo tapi dek dlarang dokter makan lado raso
ka inyo lawan pantangan dokter ko, itu kalau urang minang nan sakik, kok urang
jawa tantu lah inyo angguakan bana
nasihat dokter ko. Dek palado atau pasamba lado bana urang awak ado istilah
urang lapau bana nan agak nyeleneh stek maaf sabalunnyo kok ambo tulih bantuak
iko masalahnyo iko fakta kecek dilapau nan ambo danga “Bia lah padiah i**a asa jan lado balabiah (lah tabayang apo kato
nan ambo samarkan tu).
Bukti lain urang awak pasamba
lado, manuruik catatan statistic konsumsi cabe/lado nan paliang tinggi
perkapitanyo adolah urang/suku minang di Indonesia , tamasuak karambia/santan
jo dagiang. Mau bukti lain ko carito mande ambo jaman pendudukan Balando jo
Japang nan susah hasil pertanian gagal bareh lado dll, mako ado nan taragak bana
ingin marasokan makan jo lado, inyo siram jo aia angek stek batu lado tu dikuih
jo saludang daun pinang digalimang ka nasi, lah dapek rasan-rasan padeh baru
taraso makan. Itu dek lado putuih dicaliak batu lado kapatang masih ado
siso-siso lado nan digiliang di batu lado tu.
Baa ambo jo samba lado, lah pasti
bana mah ambo “ urang minangggg” yo harus basamba lado atau balado nan didapek
dari masakan, jiko ambo dihadokan pilihan dimuko meja makan ambo, duo samba nan partamo samba lado baluik dibaka
jo asam sundai nan hot bin padiah
rasonyo lalu samba kaduo gudek jogja komplit nan dalam balango tanah liek nan
rasonyo baradiak kakak jo saka, mako ambo piliah makan jo samba lado baluik sambia
tatap dikinyam gudek ko,,ha,,ha,,”kalamak dek angku sajo mah jepe elu tu kasih
pilihan (atau), penggabungan
(dan)..he..he..he nan gudek ko tantu lamak disantuang jo samba lado baluik
dibaka baasam sundai nan hot ko.
Okelah iko sabana pilihan, masih
nan duo tu, kok datang urang gilo baladiang manyarang ambo ka makan jo samba
tu, nan gilo baladiang ko marabuik samba ambo, sakuek tanago ambo pertahankan
samba lado baluik ko, bia lah untuak inyo gudek tu. Kok indak talawan ambo
urang gilo baladiang ko daripado ambo kanai catuak, ambo pasang lai ilmu silek
tuo, angkek samba ladobaluik baok lari.
Bukan apo-apo kok kanai catuak ambo dek si gilo baladiang ko kama ka mangadu
Pak Hakim, Jaksa atau ka Polisi, la jaleh mah si gilo bebas dari segala
tuntutan hukum indak ka kanai bagai inyo dijerat pasal perbuatan tidak
menyenangkan yaitu malarikan samba lado baluik nan hot si Jepe,,,hua..ha..ha.
Nah kok ado anak gadih dikampuang
awak nan santiang mamasak jo mambuek samba lado jaman ambo ketek dulu (antah
kok kini lai juo), capek sajo lai baretong untuak baralek lah banyak urang nan
nio ka jadi minantunyo. Nampaknyo sasuai juo jo pepatah Negara nan samo warna
benderanyo jo nagari awak Jerman nan pernah ambo danga “Cinto suami ka istri talatak diparuiknyo” Kecek kawan baru ambo di dunia maya Herr Muljadi nan urang
minang marantau di Jerman iko pepatahnyo “Die
liebe gent durch mugen” – The way to a man’s heart is through his stomach.
Samba lado nagari awak yo banyak
jenis, model dan variasinyo, indak ituangan jari tangan jo kaki lai, tapi
puluhan aneka samba lado urang minang, sabuik sajo samba lado tomat, samba lado
uok, samba lado bada, samba lado lauk tukai, samba lado baluik, samba lado asam
sundai, samba lado tanak, samba lado kincuang, samba lado taruang, samba lado
rimbang, samba lado teri medan, samba lado asam, samba lado balimbiang tunjuak,
samba lado jariang, samba lado patai…wah banyak lagi jika kita ingin mendata
pusaka kuliner samba lado nagari awak. Mulai samba lado ala urang pasisia
sampai samba lado urang darek, Nan jaleh
apopun samba lado urang minang ambo raso akan selalu menggugah salero makan
awak
Bahkan ado nan sangaik totok
samba lado nagari awak, jariang nan tuo ditimbun dalam tanah lah warna hijau
batuneh (bijo) jariang ko lalu dibaka didapua , baunnyo sanak yo pakak hiduang
awak deknyo, jarak duo kilo dari dapua tampek dibaka masih tabaun aroma
pakaknyo ko (Ehhh Jepe ente..mengada-ngada deh..dua kilo..yang bener aja).
.Oppsss tunggu dulu sanak maksud
ambo, sudah jariang bijo ko dibaka lalu ganggam jo tangan baok marathon dari
dapua sajauh duo kilometer, tu baranti istirahat angkek jariang bijo nan alah
babaka tadi ka iduang tantu masih babaun,,ha,,ha, Lalu balari liak ka dapua
soalnyo lah ditunggu urang tu buek samba lado, tokok jariang nan dibaka tadi
dibatu lado campuakan jo lado bulek, bawang merah jo garam nan disangai
salayang alun salasai lai agiah minyak tanak (minyak karambia asli) agak duo
sendok, latakan disayak nan hitam baruyuang nan umuanyo lah gaek bana..santuang
lah lai jo nasi angek, rasonyo..antah lah..baa yo…kamek kali ya.
Minggu kapatang ambo pai makan
karumah adiak bungsu mande ambo atau biaso dipanggia Etek nan samo marantau jo
ambo ka Pakanbaru, Etek ambo ko sabalun marantau lahia, ketek, gadih manjalang
punyo laki dikampuang iduik sahari-harinyo, Etek ambo ko yo santiang mamasak
apolai mambuek bamacam-macam samba lado nan tujuannyo mambangkikan salero
makan, spesialisnyo samba lado kincuang, samba lado baluik dibaka ba asam sundai, samba lado tanak, ciek lai
samba lado pusako kampuang kami namonyo samba lado Dompak mungkin sanak-sanak
di Batu sangka atau Tanah datar bisa jadi juo indak asiang lai jo samba lado
ko.
Dompak ko namo lain dari putiak
(mangga) ambacang, ambo wakatu pai tugas lua singgah di Balai Penelitian Madu
Kehutanan di Kuok Kampar, dihalaman balai nan ; luas ko tumbuah batang
ambacang. Ahhh ikonyo nan salalu dipasan etek ambo kok batugas kalapangan jiko
ado diparak masayarakt batang ambacang jaan lupo maambiak putiaknyo. Tantu ambo
ingek pasan Etek ambo ko, lah salasai batamu jo petugas balai ko, ambo ambiak
babarapo buah putiak ambacang ko (Dompak).
Bajadi ambo jo Etek ambo mambuek
samba lado dompak dirumahnyo, itu dek etek ambo masih manyimpan minyak tanak
nan dibaok dari kampuang, caro mambuek samba lado dompak ko indak batele-tela
bana, giliang lado bulek, bawang dan garam terserah apo dalam keadaan mentah
atau ditumis saketek lado jo bawang ko jo minyak tanak, pilihan lain lado
bawang ko di uok salayang, lah digiliang lado ko kubak putiak ambacang tu
diirih atau dicacah ketek-ketek galimangkan jo lado nan digiliangkan tu, nah
nan mabuek lamak diagiah duo sendok minyak tanak. Rasonyo..mmm..raso khas padeh
lado bulek (karitiang) nan lah bacampua bawang, asam segar eksotis putiak
ambacang ditingkahi dek gurih minyak tanak…yo sabana tabik salero makan deknyo…lai
jo dadar talua sajo makan pas pulo nasi angek..dijamin selero makan sanak “over
dosis”
Kok lewat mintuo sanak sadang makan
samba lado dompak tu, yo jaan di “cuekin”, imbau liau…mintuo..mintuo..singgah
lah lu karumah minantu makan samba lado dompak awak ha he..he..lah masak
pepatah kuno dikuliner minang dipakai-pakai,,nggak sopan amat ya “ kok makan
lamak indak nampak mintuo liwat” ha..ha..ha
Itulah betapa hebatnya pusaka
kuliner nagari awak, baru di samba lado alun samba-samba lain nan panuah jo
sentuhan dan cita rasa tradisional yang dalam dan didapat dari tradisi turun
temurun sejak jaman inyiak kito, iko paralu awak jago dan lestarikan keaslian
pusako kuliner kito ko, jaan sampai dilendo dek makanan-makanan global restoran
cepat saji. Nampaknyo lai indak kok masalah salero kadang-kadang urang awak lai
setia jo salero kampuangnyo, raso memang indak pernah gadang ota (bohong). Nan lamak tatap lamak dan itu adalah Pusaka Kuliner
Minangkabau yang digemari, dikagumi dan dinikmati juga oleh suku-suku lain di Indonesia bahkan
dunia.
Salam Kuliner-Jepe/ Pku, 3
Desember 2008
