Amai ambo Bundo Isna jo adidunsanak lapau, Sabana sanang ambo mambaco postingan Bundo ko, kalua kato-kato nan dahulunyo acok ambo danga dari nenek ambo almarhum. Kinipun kalo di kampuang Mama jo Papa lumayan acok manggunokannyo dek kami acok bagarah (saling ngeledek).
Papa jo Mama adolah pasangan nan pulang ka bako, Mama dari nagari kaluang sedangkan Papa di Sonsang, daerah ko masuak kanagarian Tilatang Kamang mulai dari daerah Gaduik (Pacuan Kudo Bukik Ambacang) sampai ka Tapi di dakek Bukik Durian. Kalo Kamang ilia jo Mudiak kan dari Bukik Durian tun taruih arah magek sampai ka tapi daerah baso nan di subaliak rimbo tu basuo jo nagari Suayan. Mak Ngah jaleh bana iko mah, dipeta nan Mak Ngah kirim sisuak tun lai tagambar. Desa Sonsang terkenal di era 1980an jo wisata aia "Tirtasari" nan di tutuik dek ado anak2 nan basampan tabanam masuak ka "mansiro lauik" (sebutan utk rawa2 di tapi Bukik di Sonsang nan panuang aia jo taratai plus rumpuik mansiro). Kalo di Canduang dibuek urang untuak lapiak. Desa Sonsang ko pintu kaporo untuak masuak ka rimbo Manduang tampek urang kampuang ijok. Rina sanang bana manggunokan bahaso nenek dulu ko dek raso-raso baliak kaciak. Ampia sadono tulisan rina di rantaunet ko pakai bahaso awak. Istilah nan rina pakaipun, adolah istilah nan agak jarang kalua di keseharian rina katu kaciak. Kebanyakan istilah rina dapek dari Mama, papa, nenek atau Inyiak juo jo runsanak di kampuang kami tu. Pernah rina pakai istilah "kindorok"(andorok/rok) dipatanyokan jo di keluhkan dek pembaca postingan Rina. Ndee rina apo bahaso yang rina pakai koh? Indak paham wak doh. Tanyo nan sampai ka rina katu tu. Ruponyo kini rina dapek mambaconyo dari posting Bundo baliak yaitu : Andorok. Mungkin nenek dulu manyabuik "kindorok" ko dari singkatan kain andorok nan disabuik sacaro capek jadinyo " kindorok". Trus kato2 'Kingulu" (bantal) kalo nenek manyabuiknyo kalangulu. Kibasuah pun masih kami gunokan hari2 di Rumah di Bukik Trus lali -pun masih pakai (sadingin iduang kuciang kan Bundo?):) Trus mangubiak, hal iko pernah dicaritoan khusus dek Mama ka rina, kalo saisuak tu kami karajo mangubiak, mandok-mandok dari Inyiak jo nenek barami-rami maambiak sipuluik untuak ka dikubiak. Iko Mama caritoan ukatu mancaliak ambo makan kuaci atau makan pensi di luar batas kewajaran hahaha...Rina yo sangaik cangok kalo lah jo kuaci atau pensi ko Bundo. Kalo ado lomba makan pensi jo kuaci tercepat dan akurat, Rina daftar ciek hehehe... O iyo Bundo? Lai ado Bundo basobok jo makanan saisuak tu nan ngangeni? Yaitu galu-galu? Rina taragak bana jo galu-galu ko. Tapi indak ado dijua urang di batam ko doh :( Mudah2an Bundo salalu sehat baitu juo Rang Tuo di lapau ko sadono. Wassalam Rina, 33, batam -- . Posting yg berasal dari Palanta RantauNet ini, jika dipublikasikan ditempat lain wajib mencantumkan sumbernya: ~dari Palanta r...@ntaunet http://groups.google.com/group/RantauNet/~ =========================================================== UNTUK DIPERHATIKAN, melanggar akan dimoderasi: - DILARANG: 1. Email besar dari 200KB; 2. Email attachment, tawarkan disini & kirim melalui jalur pribadi; 3. One Liner. - Anggota WAJIB mematuhi peraturan serta mengirim biodata! Lihat di: http://groups.google.com/group/RantauNet/web/peraturan-rantaunet - Tulis Nama, Umur & Lokasi pada setiap posting - Hapus footer & seluruh bagian tdk perlu dalam melakukan reply - Untuk topik/subjek baru buat email baru, tidak dengan mereply email lama =========================================================== Berhenti, bergabung kembali serta ingin merubah konfigurasi/settingan keanggotaan di: http://groups.google.com/group/RantauNet/subscribe
