Assalamu'alaykum Wr.Wb. Rangkayo Rahima Rahim jo Ahmad Ridha ibn Zainal Arifin ibn Muhammad Hamim sarato sidang RN nan ambo muliakan
Sabalun rundiang sabuah kadisabuk, kato sapatah basampaikan, elok disampaikan dulu "Salamaik Ari Rayo Idul Fitri 1425 H", maaf lahia jo Bathin. Rundiang kok ado nan basaluak kato ko ado dorong lompatan pado mambarek di ari isuak elok lah samo dimaafkan. adopun rundiang nan ambo tibokan. bukanlah ambo basudi jo siasek, tapi basunguah-sungguah batanyo iyo tantangan nan "baralek" apokoh garan (ado) dasarno di ugamo supayo nak sairiang adat jo ugamo, tasuo Syara' mangato Adat mamakai, mako tantuno nan dilakukan / dikarajokan dalam adat ado nan manjadi dasar dalam agamo, khususno dalam hal iko adolah "Baralek" (perkawinan). karano mambilang iyo dari aso, kok mangaji bamulo dari Alif, mako dalam "baralek" mampunyoi langkah-langkah : 1. Maninjau-ninjau (marambah jalan, marosok-rosok, maresek-resek, babisiak-bisiak, mancari angin) 2. Manjapuik-i (maminang) 3. Batuka Tando (Basaluak Tando / Tuka Cincin) 4. Akad Nikah. 5. Baralek (maimbau makan / syukuran / Walimahan caro Jawa) kok acara "Baralek" nan di adat awak, kok diulua amuah panjang, kok dipunta bisa pulo singkek, kadang ado nan "Baralek" gadang, kadang ado pulo nan "Bacilukkan aia" sajo. nan "bacilukkan aia" ko mukasukno adolah hanyo malakasanakan akad nikah, kok lai bana diimbau urang karumah, hanyo maimbau makan "urang Siak" (Urang Musajik) sajo. sado itulah rundiangan nan katangah dari ambo, iyo nan mintak disiangkan bak ari, ditarangkan bak bulan, aratino bana mintak dijalehkan dasar Aqli atau Naqli supayo nak tasuo nan syarak Mangato Adat Mamakai(ABS_SBK). baharok pintak lai ka buliah, kandak lai ka bapalakukan, labiah kurangno, rila jo mauh juo nan bamintak. Wassalamu'alaykum Wr.Wb. Bandaro Labiah. ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________