Ma sagalo adidunsanak jo anak kamanakan di salapan pinjuru angin, Assalamu'alaikum wr. wb.
Walaupun ambo lah 8 hari baliak ka Padang, tapi dek paruik komputer ambo ko gaca pulo ambo dapeki baitu tibo di dangau hari Jumaik pakan nan lalu, ambo indak bisa ka lapau. Hari Sabtu, 25-12, hari libur, hari Akaik tanggal sirah. Baru bisa ambo bao ka dukunnyo hari Sinayan, dan dek sakiknyo agak barek, kecek dukun musti "rawat inap" dan baru bisa ambo japuik kapatang sanjo. Subuah cako baru bisa download imel nan lah ampia 700 postiang talungguak di server ISP. Hampia satu jam ambo download, dan ampia 400 nan talungguak di folder palanta. Baru sabanta ko sudah ambo scan, dan manulih posting partamo ko. Partamo sakali ambo mangucapkan banyak tarimo kasih ka sagalo adidunsanak jo anak kamanakan nan lah bahambauan dari sagalo pinjuru angin ikuik basimpati dan mandoakan agar operasi kanker tiroid nan musti dijalani induak bareh ambo di RS Kanker Dharmais, Jakarta. Indak taatok dibilang gala tiok adidunsanak jo anak kamanakan, baiak nan mangirim sms (antaro lain dari kamanakan ambo Rahima dari Kairo dan sanak ambo Sjamsir Sjarif dari Santa Kuruih dan banyak sangaik nan lain) maupun posting ka palanta nan baru sabanta ko ambo baco, talabiah-labiah nan lah basusah payah manyilau ka RS: kamanakan ambo Bandaro Labiah dari Patra Jasa jo Bandaro nan sangajo datang dari Bogor, jo dunsanak ambo, Bundo kito di palanta, Rangkayo Nismah Rumzi. Baitu juo ka adidunsanak jo anak kamanakannan lah basusah payah malewakan di lapau kutiko ambo off-line. Indak ado nan bisa ambo sabuik kiniko salain tarimo kasih nan indak tainggo, mudah-mudahan manjadi amal ibadah bagi adidunsanak jo anak kamanakan di sisi Allah swt.. Amin ya rabbal alamin. Alhamdulillah, operasi nan makan waktu lk 2,5 jam hari Sinayan, 20-12, berhasil sukses. Cuma, treatment radiasi nan harus dijalani pasca operasi punyo efek sampiang, yaitu, naiaknyo kadar gulo darah sampai 400 (kabanyo nan normal 120-180) nan mangakibaikan badannyo lameh, walaupun sabalunnyo baliau indak pernah menderita diabetes. Manuruik dokter nan marawat, nantik, sasudah paket radiasi nan 20 sp 30 kali salasai, kadar gulo darah baliak normal co samulo. Mudah-mudahan, tolong jo doa. Akibaiknyo, baliau musti disuntik insulin 3 x sahari, dan musti di bawah kontrol dokter taruih manaruih. Jadi sampai saat ko, baliau masih rawat inap di Dharmais. Mungkin adidunsanak jo anak kamanakan lah tau juo, salamo ko kami tingga baduo sajo manunggui dangau di Tabiang, dek sagalo anak di Banduang. Kini, sasudah kondisi rang rumah indak baitu mangkhawatirkan, hari Jumaik, 24-12, ambo baliak ka Padang, dek cameh pulo maninggaan rumah takunci sajo, walaupun dipitaruahan ka tetangga sabalah. Kini ambo jadi satpam panunggu dangau, jadi bujang lokal, antah sampai pabilo. Dek musti manalepon rang rumah 2 @ 3 kalai sahari, di sampiang taruih standby di Halo 0812 6600 639, ambo pagunoan pulo Kartu As nan tarif manalepon jauah labiah ekonomis, cuma Rp 1200,-/minik flat Sabang Merauke, 24 jam dan bebas roaming nasional dg no. 0852 630 77737. Maklum, pansiunan, tapaso mancari nan paliang murah. Salam, mak Sati (67->68) Tabiang, Padang ____________________________________________________ Berhenti/mengganti konfigurasi keanggotaan anda, silahkan ke: http://rantaunet.org/palanta-setting ------------------------------------------------------------ Tata Tertib Palanta RantauNet: http://rantaunet.org/palanta-tatatertib ____________________________________________________
