Re: [RantauNet.Com] Perkawinan langka - Kebebasan.

[Darul Makmur]

Assalamualaikum Ww.

 

SBN, Bundo, sanak Mulyadi dan sidang RN nan ambo junjuang tinggi. Ambo tau awak kasadoan nan duduak di palantako, iyo bana pidik. Dek ingin basuo sarato bakucindan jo kanti dan sanak, di lakikan juo diwakatu pidik nantun kasiko.

 

Dek itulah awak disiko, iyo kadang atabo, tarendong atau banyak dipangaruahi dek macam keadaan. Keadaan dirumah, keadaan dikantua, keadaan di jalan nan macet, keadaan ekonomi nan mambabani awak kiniko. Namuah ataupun indak, keadaanko pastilah mampangaruahi awak, mampangaruihi caro awak bapikia, mampangaruihi caro awak batindak, caro awak baintegrasi disiko, disidang palanta nan damia sarato indah, saroman wajah Miang nan awak bayangkan basamo.

 

Palantako adolah tompaik awak duduak ditangah rumah gadang, jadi disiko iyo bamacam lapisan nan ado. Jadi saketek sajo bisiak lah laweh katalingo nan datang siliah baganti. Ado rang sumando manyumando, ado ipa bisan, ado anak kamanakan, ado alim ulama, ado niniak mamak, ado pemuda, ado kanak-kanak, ado bayi dlsb.

 

 Dek itulah disiko ado caro, ado adat, ado tatatertib, ado garih nan jaleh. Kok itu dilangga malu awak dek rang sumando, malu awak dek tetangga nan tadi sato lo minum kopi.

 

Untuak mamak SBN dan sanak nan mungkin lai sanang atau ingin manaruihkan, diskusi tantang apo sajo. Bia kecek awak, bia tangka awak indak didanga dek urang nan indak patuik mandanga, bia rundiang awak labiah intend, baranjak awak kabiliak, kakamar nan alah disadiokan dek tuan rumah.

 

Kami admin alah manyadiokan kamar, ado 5 kamar:

1. Biliak Ekonomi, masih jalan, tapi agak lambek. Lah lahia ciek ide tapi tasuak-suak jalannyo kini.
2. Biliak Pendidikan, pernah intend, tapi alun ado hasia nan rancak.
3. Biliak Sosbud, dinakodai dek mak SBN terakhir, mak SBN ancaklah diajak urang nan sanang badiskusi dibiliakko. Satantangan nan mamak angkeko, iyo rancak ka biliakkolah duduak. Nanti kalau alah ado hasianyo baru awak bao ka tangah rumah gadang baliak.
4. Biliak Keunggulan Minang (Competitive Advantage), alun aktif lai.
5. Biliak Bundo Kanduang, pernah sakali-sakali muncul.

Mak SBN alah pernah juo ambo sarankan dulu, untuak hal nan barek, baolah baganjua sanak atau sumando nan lain nan ingin kasato. Bisa dituntaskan disitu, kalau lai ado nan ingin manuntaskannyo.

 

Jo baganjuanyo sabagian awak ka biliak, insyaAllah palanta awakko bisa salalu damai, panuah klkeceriaan dan kekeluargaan.

 

Untuak nan alun tau, disampiang biliak nan diateh, ado babarapo biliak nan lain. Saparati biliak anak mudao nan diRN disabuik rang-mudo. Disitu anak mudo bisa candak jo gaya darah mudonyo, gaya kreatifitas nan diselingi jo candak ria. Jadi indak manggaduah nan tuo, nan mungkin tasingguang jo prokem mereka.

 

Bia labiah tarang, ado anggota RN nan masuak ka bamacam biliak. Ado nan hanyo dipalantako sajo, ado nan disalah satu biliak sajo. Bebas manuruik kahandak masiang-masiang. Dek awak "dialam bebas, tapi tau gendeang nan kamanimpo".

 

Hhhhhhhhhhhmmmmmmmmm Ajo Buyuang, Bundo, ambo dan nan gahat lainnyo tagabuang juo dibiliak rang-mudo. Kami enjoy disitu.

 

Sanak atau kanti nan ingin sato disalah satu atau babarapo biliak, dapek dibisiakkan ka ambo atau Miko. Nanti tahu-tahu lah duduak sajo di biliak nan diingini nantun.

 

Baliak rundiangan ka mak SBN, dibiliak Sosbud silah kok ka ditaruihkan rundiang awakko. Dan ambo mohon maaf jikok ado nan indak talatak ditompaiknyo, jikok talantak kanaiak, tasingguang katurun. Ambo raso sakitu dulu. Wabillahi taufiq wal hidayah

 

Wass. Ww

St.P

SBN <[EMAIL PROTECTED]> wrote:

Assalamu'alaikum wr. wb.

 

Manolah Sutan Parpatiah basarato jo Uni Nismah, sarato pulo dunsanak nan salingka milis iko.

Ambo susun jari nan sapuluah sabaleh jo kapalo, dek ado nan maraso kusuik, elok awak baiyo jo batido baliek.

Sajak ambo diajak bagabuang ka milis iko, indak lain dek karano masih samo-samo atensi ka ranah Minang,

kanyataan pulo urang minang dan ranah minang itu banyak masalahnyo kini. Sagalo macam posting masuak

sahubuangan soal iko dari nan manih, tawa, kalek sampai nan paik sadonyo ingin ka "mambangkik batang

tarandam" sarato baa ka manjadi "center of exellence" (istilah St Parpatiah). Alah banyak usaho nan dikakok

walaupun hasianyo alun nampak lai. Ambo sadar bana masalah minang tu indak sederhana, kan lah nampak

salamoko bara sariknyo untuak mamuloi dan antah bara pulo dunsanak nanlah korban parasaan.

Mungkin awak babeda persepsi soal masyarakat khususnya masyarakat minang, dulu wakatu MI sadang

angek lai satuju jo arah masyarakat terbuka, tapi kiniko kok lah balain pulo salero pulo soal masyarakat ko.

 

Soal balain salero adolah hak dan kodrat manusia nan sunatullah, nan kaindak mungkin manusia manyatukan

inyo, baitu pulo soal kabebasan bapikia, adolah kodrat dasar dari manusia. Setiap pemikiran akan menemui

disetujui atau tidak disetujui atau tidak disenangi. Nan paliang rancak memang nan katuju dek urang lamak

diawak, namun iko indak barati nan indak katuju dek awak lalu basilanteh angan sajo mausia urang.

Kamanakan-kamanakan bisa sajo diagitasi jadi banci ka pamikiran sasaurang, tapi iko bukan caro nan sasuai

jo alue jo patuik. Kok ado pamikiran nan indak sasuai jo salero, eloknyo di counter jo argumen nan labiah

kuek, kalau argumen itu labiah kuek, dengan sandirinyo pemikiran itu akan hilang sendiri.

 

Mambatasi topik, kabaliak pulo baliak kajaman pak tuo, iyo indak lanteh angan doh, antahlah kok lah banyak

pulo para doens nan lah tamakan angin militeristik sarato mataramisme nan muloi barambuih baliak, bak 

sindiran sanak IJP barapo wakatu nan lalu. Namun kok ka mambatehi jo argumen atau wacana, silahkan.

Duduak basamo balapang-lapang, indak bisa dimuloi tanpa kelapangan dada, ado nan indak sasuai jo salero

silahkan di counter jo argumen an labiah kuat, kalau argumen awak lamah, iyo balapang dado pulo manarimo.

Indak sio-sio pulo urang saisuak mananamkan adat nan basandika n ka nan bana. Tingga di awak kini lai

namuah manaruihkan mancari nan bana tu.

 

Ambo sangaik manghargai keberatan St. Parpatiah jo Uni Nismah, namun tolong disaratoi argumen dan

wacana, dek karano sintesis tatap barasa dari tesis jo anti tesis. 

 

.... mupakaik barajo ka alue jo patuik,

alue jo patuik barajo ka nan bana.

 

Mohon maaf sakali lai kok ado kato nan manyingguang.

Salam

 

St. Bagindo Nagari

 

 

---

Do you Yahoo!?
SBC Yahoo! DSL - Now only $29.95 per month!