Walaupun namo jaleh sarato alamaik langkok ado pulo dibawah, namun dek karano tingga di Amrik kini, paralu pulo namo singkek batambah jo "U.S.A", di balakangnyo.
Ambo takana jo kawan lamo ambo.
Namonyo Simon S. Lantiak.
Baa kok namonyo Simon nan sarupo urang kabarat-baratan? Sabananyo mambaconyo iyobana "simon", indak 'Saimon" sarupo dalam bahaso Inggirih. Namo aslinyo sabanonyo mon- apolah... indak takana di am bo. Tapi dek batambah jo awalan "si", mangko namo si Mon ko basarangkaikan sajo manjadi "Simon" sajo, sarupo namo urang baraik.
Gaeknyo nan laki2 barasa dari Sungai Bulantiak (atau Sei Bulantiak sajo untuak singkeknyo). Dek acok bolak baliak manyubarang aia dari kampuang ambo ka Si Bulantiak, akhianyo namonyo lakek pulolah jadi "Simon Sei. Bulantiak".
(Kato "sungai" itu acok basingkekkan jadi "sei" ajo di kampuang ambo."
Walupun di dompet Simon SB ko lakek stiker bagambar tangan kaduobalah sadang tabukak saarupo tangan urang ka mando'a, dibawahnyo ado tulisan "Hidupku di Tangan Tuhan", sarato paspoto Simon SB tu di tangah2 tangan nan tabukak tu (ado space disadiokan ditangah2 stiker tu tampek malatakkan paspoto), namun kadang2 pandapek-pandapek Simon S Bulantiak ko acok bana jauah malawua-nyo daripado Tuhan nan keceknyo malatakkannyo di ateh tangan-Nyo tu.
Suatu kali, pernah inyo batanyo ka ambo, wakatu duduak di lapau Alm. Mak Utiah, kiro2 pukua ampek sanjo.
"Waang picayo ndak manusia ko barasa dari baruak?" tanyo Simon SB tu tibo2 ka ambo.
Ampiang tacakuik ambo nan sadang manunuik kopi cap Serbuk Sari nan asli, asli bacampua jo jaguang.
"Baa kok itu nan angku tanyokan?" Jawek ambo maulua wakatu, karano ambo indak yakin pulo jo a kadijawek.
"Pokoknyo waang picayo ndak?" Disasakkannyo ambo dek Simon tu. Tapasolah ambo manjawek; "Tantu indak picayo ambo, baa pulo manusia barasa dari baruak. Jikok manusia barasa dari baruak, baa kok ado juo baruak kini!" Jawek ambo alah mulai yakin.
"Aden picayo." Kecek Simon manaruihkan. Tantu batanyo ambo sakali, baa kok inyo sampai picayo.
"Sabab, cubo paratikan dek waang..." Keceknyo sambia manunjuak ka batang durian Mak Miuh (Thamius namo aslinyo) nan indak jauah dari lapau tu, di dakek gurun pas subarang jalan, dari lapau tampek kami duduak.
Katiko tu sadang musim durian. Salah surang kamanakan Mak Miuh nampaknyo duduak dalam dangau di dakek batang durian tu, maunyikan durian ka rareh. Di kampuang ambo, nan banamo Tiaka, Kec. Guguak, Limopuluh Koto, Payokumbuah mudiak, jikok durian indak ado nan maunyikan mangko buahnyo nan jatuah buliah dibao dek urang nan lalu. Sadangkan kalau ado urang nan maunyikan, mangko kalau durian tu rareh, haram hukumnyo maambiak, karano urang nan punyo ado disinan, maunyikan.
"Kalau rareh durian tu, cubo waang ambiak." Kecek Simon SB malanjuikkan. Ambo manyimak jo panuah paratian.
"Kalau waang ambiak durian tu, sadangkan urang punyonyo ado disinan, mangko dari ma asa waang pasti disabuik urang."
"Apo nan kadisabuik urang?" tanyo ambo panuah salidik. Apo pulo hubungannyo ko antaro asa manusia dari baruak, jo durian rareh? Baitu dalam hati ambo batanyo-tanyo.
"Iyo, cubolah ambiak." Kecek Simon malanjuikkan sangajo malambek-lambek-an dek tau inyo bahaso ambo panasaran.
"Baa kecek urang beko; 'HOI, IYO JALEH BARUAK ASA WAANG KO, JALEH DURIAN ADO NAN MAUNYIKAN WAANG AMBIAK JUO!!!'
Itu nan jaleh ka disabuik urang ka waang!" Keceknyo.
"Kan****g, kalau baitu tantu iyo." Kecek ambo, takanai ambo dinyo. Urang sabalik lapau pacah galaknyo, lamo mangko ka baranti.
Babaliak kito ka asa carito.
Jikok kito simak pulo ota mamak2 kito nan tingga di Amrik tu, iyo lasuah pulo.
"Baa kaba Pak Adang, lai acok juo minun kopi di lapau Tan Magek di Seattle tu?"
"Ambo rencana ka singgah sabanta sabalun bajalan ka Houston, tapi kamanakan ambo nan di Iowa manyuruah ambo langsuang barangkek sasudah sumbayang subuah di Las Vegas."
Ondeh, iyo bana lasuah mandanga-nyo. Raso a lah tingga di Amrik tu. Nagari maju, kasado fasilitas ado. Pabilo lah kito barangkek ka sinan?
Katiko ambo kirim surek liwaik pos ka kawan ambo Simon S Lantiak tu nan kini tingga di Tolang Maua, dakek Mungka, payokumbuah mudiak juo, dek babinyi jo urang situ, jaweknyo nan ambo tarimo liwaik kilat khusus sasudah tu, mambuek kaniang ambo mangkaruik.
"Indak ado se tu doh." Tulih Simon Sei Bulantiak nan alah baranak duo tu kini bakeh ambo.
"Tingga nyo sajo nan di Amrik, tapi realitasnyo labiah udik daripado urang Sungai Antuan." (Sungai Antuan tu daerah tarisolir tibo kateh Tolang Maua.)
Ati ambo batanyo-tanyo, tapi ambo taruihkan juo mambaco;
"Tingga lai di pusat kemajuan, tapi tatap menganggap urang nan maju tu sebagai manusia indak baguno, kapia! Karak2 karak narako kasadonyo!"
"Nan baanggap mulia bangso Arab, sadangkan apo nan ditamukan bangso Arab bagi kamajuan umaik manusia? Jikok iyo cuma Tuanalah nan ciek tu, nan Subana-bananyo Tuanalah nan datang ka urang2 Arab tu, manga urang kapia nan manamukan kasado pangatahuan nan bamanfaat untuak umaik manusia?
Dari jarum panjai sampai kapa tabang, komputer nan angku pakai kini, rokok nan baisok.., indak ado urang Arab nan manomukan."
"Awak lah diota urang panggaleh, di abaik ka tujuah baleh tibo inyo ka nagari awak.... --"
Tapaso lah ambo indak bisa malanjuikkan isi surek Simon Sei Bulantiak tu disiko.
Sabab, bisa dikaluakan ambo dek Niniak Mamak kito nan duduak di ateh tingkah di palanta ko.
(w) Senin 13 September 2004/ 27 Rajab 1425 H. A tribute to Selina Destiani (today is two years), my daughter.
I love you, more than any religion.
---------------------------------------- Do You Urangawak?
Join the [EMAIL PROTECTED]
The group of Minangkabau folks worldwide
To join, click http://groups.yahoo.com/group/urangawak ---------------------------------------- ____________________________________________________
Berhenti/mengganti konfigurasi keanggotaan anda, silahkan ke: http://rantaunet.org/palanta-setting
------------------------------------------------------------
Tata Tertib Palanta RantauNet:
http://rantaunet.org/palanta-tatatertib
____________________________________________________
