Boas, Para quen non estea familiarizado co xogo, dicir que cada unidade do xogo pertence sempre a unha “aliñación“ determinada, dividíndose en: - legais ─atacan mellor polo día e peor pola noite─, - caóticas ─atacan mellor pola noite e peor polo día─ e - neutrais ─non lles afecta o momento do día─.
O caso é que agora engadiron unha cuarta aliñación moi rara (no sentido de que apenas aparece no xogo, segundo teño entendido): “liminal”. As unidades desa aliñación atacan mellor nos cambios de día, amencer e anoitecer (a secas, non atacan peor noutros momentos). Ten que ser un adxectivo, sen ser necesario que o acompañe un substantivo (como adoita ocorrer coas habilidades e trazos do xogo na tradución ao galego), que exprese que a unidade está dalgunha maneira relacionada con iso, co cambio de día a noite e viceversa, como nun punto medio entre dúas realidades se o preferides. Ocorréraseme «aureolar», como adxectivo de «aurora». Comenteillo hoxe á mañá a uns compañeiros de clase, e dixéronme que iso en todo caso referiríase ás aureolas (o da cabeza dos santos), e comprobándoo logo na Internet resulta que se trata dun verbo transitivo que nada ten que ver coas auroras. Cando lles expliquei do que ía, suxeríronme buscar algún sinónimo de «transitorio». Ningún dos que vin no DRAG (provisional, temporal) me gustaron moito, pero o termo relacionado «pasaxeiro» pareceume interesante, como idea de «que vai de camiño entre o día e a noite». Ademais, como sinónimos deste último temos «pasadío» e «fuxidío» (palabra esta última que se emprega xa para dar nome á “elfa fuxidía”). Así que de momento teño como posibilidades: transitorio, pasaxeiro, pasadío e fuxidío. Opinións? Máis alternativas? _______________________________________________ Proxecto mailing list Proxecto@trasno.net http://listas.trasno.net/listinfo/proxecto
