Atera da azkenean Jaurlaritzaren dekretua Praileaitz babesteko. Erabaki salomoniko baten itxura du. Batetik aztarnategia babesten du, baina bestetik harrobiko lanek aurrera jarraitzea baimentzen du 80 metrora. Peñalverrek adierazpen gogorrak egin ditu eta haserre antzematen zaio.
Legeak esaten du aztarnategi batean margoak agertzen badira aztarnategia eta bere ingurunea babestu behar direla. Baina ingurunea zer den ez du zehazten. Aranzadik eskatzen zuen mendi-lepo osoa har zedila ingurunetzat eta beraz harrobiaren lanak erabat eten daitezela. Jaurlaritzak ez du horrela erabaki eta hortik haserrea. Peñalverrek gaur prentsan egindako adierazpenetan esaten duenez ez da ezagutzen leizea noraino iritsi daitekeen. Beraz, gaur ezagutzen diren mugak baino ez dira errespetatuko eta ondorioz oraindik ezagutzen ez diren galeria batzuk suntsitu daitezke harrobiak aurrera jarraitzen duenean. Ni Praileaitzen lehen aldiz sartu nintzenean nahiko haitzulo txikia iruditu zitzaidan. Sarrerako aretoa, eta eskuma eta ezkerrera gela bana, besterik ez. Sarrerako areto horretan bertan bi sutegi aurkituak zituzten, eta esertzeko zein suharriak lantzeko erabili izan zen harrizko eserleku moduko bat. Bigarren aldian ezkerreko gela ari ziren industen (zintzilikarioak aurkitu ziren tokian) eta barrenera zulo bat ikusi nuen. "Hor zer dago?" galdetu nion Peñalverri, eta berak emozio aurpegia jarri zuen, "leizeak jarraitzen du!". Industu ahala joan dira agertzen leizean barrena gela berriak eta horietako batean agertu dira margoak. Ogrosabelek hobeto jakingo du baina normala omen da leizeetan galeria osoak estalita geratzea (ur korronte batek lokatza ekarri duelako, sapaia erori delako, edo besterik gabe sedimentua pilatzen joan delako...) eta beraz lurra kentzerakoan agertzen hastea berriz. Praielaitzek zein sakonera duen ez dakit, eta badirudi baliteke ikertzaileek berek ere ez dakitela. Bestalde, orain gutxi Praileaitzetik gertu eta mendi-magal berean beste haitzulo bat aurkitu dute. Baina harrobiaren lanak direla eta segurtasun arrazoiengatik erabat debekatua dute bertara hurbiltzea, ondorioz, arkeologikoki interesik izan dezakeen aztertzeko aukerarik eman gabe suntsituko omen da haitzulo hori. oier. _______________________________________________ Adi gero, mezuak bidaltzeko: [email protected] http://www.eibar.org/zerrenda harpidetza eteteko: [EMAIL PROTECTED]
