Poe jumaah kamari kuring papanggih jeung babaturan sakola, awewe. Geus lila teu papanggih, sanajan kantorna di Bandung, tapi nanehna ayeuna keur kuliah deui nyokot S3 di Jakarta. Biasa si eta mah carahal-cirihil, ngobrol kaditu-kadieu, lila-lila obrolan teh nyaritakeun soal nyandungna Aa Gym. Cakakak manehna teh seuri ....ah da biasana cenah urang Sunda mah karesepna nyandung teu kaop maju saeutik. Ceuk kuring teh ulah kitu, kawas lain urang Sunda wae, maneh teh.
"Heueuh da loba contona", pokna teh. "Dulur sayah ge hiji oge euweuh nu boga salaki ka urang Sunda. Ngan sayah we nu boga salaki ka urang Sunda deui teh" "Tah pan salaki teu nyandung lain?", ceuk kuring teh "Heueuh, kabeneran we bageur, teuing lamun beunghar mah", cenah bari nyakakak. Naha bener urang sunda beuki nyandung? meureun. Ngan katingali stereotyping lalaki Sunda beuki nyandung, cukup kuat. Teu kurang MAW Brouwer baheula nulis di Kompas di taun 1970'an, waktu manehna ngasuh "Kontak Psikologi", Lamun hayang boga salaki anu nurut, bageur, kawin jeung Urang Jawa. Tapi upama hayang nu "hot", kawin jeung lalaki Sunda, ngan kudu kuat engkena sok dipangnyandungkeun. Pamajikan kuring geus 8 taun ngurus gedong di kantorna ( di Bandung) nu sok dipake resepsi kawinan. Nu matak kaget, salila 8 taun nguruskeun gedong, ampir 80% nu kawin, awewena urang Sunda, lalakina lain urang Sunda!. Kadang kuring sok nanya ka pamajikan, kunaon eta teh, awewe Sunda loba2 teuing kawin jeung etnik sejen. Jawab pamajikan teh sangeunahna, " Da urang Sunda mah beuki nyandung!", kawas salakina lain urang Sunda wae. Enya kitu, lalaki Sunda boga bakat jadi polygamer? Baktos, WALUYA
