Ez naiz ni Txabarrik egindakoa aztertzen hasiko, ez baitut ezagutzen egindako
lan guztia.
Ostera, irakurri eta entzun diodanetan, berba egiteko moduan harroskoa oso
iruditu zait, bere moduan pentsatzen ez dutenekiko errespetu faltarekin eta
prepotentzia puntuarekin: jendaurrean errietan egin die, gogora datorkidanez,
Andu Lertxundiri, Eskoriatzako alkateari, Bergarako alkateari; hirugarren
pertsona maiestatikoa erabili du erruz bere handitasuna nabarmentzeko... Hori
guztia, aitortu behar diot, oso euskara onean. Horra hor aportazio inportante
bat, eta ironia barik diot.
Agintariak eta euskararen harira, egun hauetan GoienaTBn ikusi ditudanean
Debagoieneko alkateak, hirugarren egunean edo, konturatu nintzen normalak
ginela: alkate guztiek normal hitz egiten dute euskaraz, hau da, ondo,
hizkuntza normal batean biziko bagina bezala, bai hizkera arruntean bai alkate
bati dagokion jasoagoan, eta zirudienez, alfabetatutakoan.
Ikaragarri eskertu netsen hori.
Elena
----- Original Message -----
From: Amatiño
To: Eibartarrak zerrenda
Sent: Tuesday, June 26, 2007 10:05 AM
Subject: [eibar] Txabarriren listoia
Hona non Gipuzkoako Batzar Nagusietako lehendakari berria ez den, azkenik,
euskalduna. Ez da kritika, ñabardura hutsa baino. Erabaki demokratikoa izan da
eta kitto. Halere, ez dut uste hankasartzea denik esatea, aukeran, gehienok
nahiago genuela euskalduna, baita sozialistek ere irabazle aterako zirela
aurrez sumatu izan balute.
Orain, berriz, Diputazioan zer? Auskalo zer gertatuko den baina jakinekoa da
Gipuzkoako Aldun Nagusi demokratiko den-denak euskaldunak izan direla beti,
beti gero, historia guztian zehar.
Gainera, ez dut nik zalantzan jarriko azken hiru mendeotako diputatu nagusien
euskaltzaletasuna -Xabier Munibe, Azkoitiko zalduntxoa tarteko-- baina, onartu
ere onartu beharko, Joxe Joan Gonzalez de Txabarri besterik izan dela, ez baita
alferrik hirurogeigarren hamarkadako belaunaldiaren kimua, umetan alfabetatua
eta gazte-gaztetandik euskalgintzaren behargina.
Ezin gero hogei segunduan Txabarrik lau urtean egindakorik laburbildu. Baina
gogoratu dezagun karguaz jabetu bezain laster esan ziela kazetariei, euskararen
duintasunaren mesedetan ez zituela prentsaurrekoetan bere buruaren
itzultzailearenak egingo.
Gogoratu ere, euskal testu zaharren bilketan, linguistika alorrean edota
euskara-erakundeekiko lankidetzan jorratu izan dituen urraspideak.
Segurutik Txabarrik ez du guztia ondo egin, baina euskalgintzaren listoia
dezente goian laga du. Goi horri eustea izango al da hurrengoaren erronka¡
Amatiño
Goiz kronika
Euskadi Irratia
2007.06.26
------------------------------------------------------------------------------
_______________________________________________
Adi gero, mezuak bidaltzeko: [email protected]
http://www.eibar.org/zerrenda
harpidetza eteteko: [EMAIL PROTECTED]
_______________________________________________
Adi gero, mezuak bidaltzeko: [email protected]
http://www.eibar.org/zerrenda
harpidetza eteteko: [EMAIL PROTECTED]
