Budak leutik bisa ngapung Babaku ngapungna peuting Nguriling kakalayangan Néangan nu amis-amis Sarupaning bubuahan Naon waé nu kapanggih
Tutungkusan ti karuhun Dipiara dipupusti Ku warga di alam maya Nu karasép nu gareulis Komunitas Urang Sunda Di Internét seja ngancik Ku bubuka dua pada Pupuh KINANTI di luhur, kuring neda widi deui ka sadayana pikeun mairan panitia pajemuhan di Wisma Unpad, anu Alhamdulillah wartosna tos lumangsung kalayan lungsur langsar. Kang Oman, dulur kuring ti tatar Galuh, hatur nuhun kana waleranana. Tapi ulah lepat harti, da kuring mah teu ngajak paréa-réa omong. Di ieu milis, kuring henteu ngomong sakecap-kecap acan, éstuning mung tiasa ngedalkeun eusi haté ku tulisan. Jadi, lepat kabina-bina upama kuring dianggap ngajak paréa-réa omong. Basa kuring nulis ieu surat, sakapeung diselangan heula ku maca buku "Yang Datang Telanjang" (Surat-surat Ajip Rosidi dari jepang 1980-2002, Kepustakaan Populer Gramedia, 2008), anu kandelna 804 kaca. Eusi surat-surat Kang Ajip Rosidi téh ditujukeun ka Asrul Sani, Nugroho Notosusanto, Subagio Sastrowardoyo, sareng sajabina. Kitu kahirupan di darat mah, surat-surat téh nepi ka dibukukeun, bisa dibaca ku saha baé nu daék meuli, nginjeum, atawa ménta buku. Jadi, balaka baé, kuring kakara terang upama di milis aya étika yén surat japri kudu diwalonan ka japri, pon kitu deui surat group diwalonan deui ka group. Ana kitu mah heureut pisan kabébasan di dunya maya téh, dunya anu cenah mah global, tempat pakumbuhan jalma (boa kaasup jin) saalam dunya. Surat kuring nu munggaran, henteu aya anu dibantah ku Kang Oman. Ngandung harti, sagala anu ditulis ku kuring téh luyu jeung kanyataanana. Batan ngabantah eusi surat mah, kalah masualkeun téknis surat. Tapi teu sawios-wios, upama katiasana ngan samet dinya mah tangtos dima'lum ku kuring ogé. Pangna surat kuring dicemplungkeun ka group, aya sawatara alesan. Di antarana: 1. Kuring tara biasa susulumputan, kajaba mun nuju bobogohan. 2. Kuring teu terang upama anu diulem téh mung sabagéan warga Kusnét (dipilihan), sabab dina eusi surat Kang Oman, ditandeskeun yén Kang Oman ngawakilan sadayana. Ari ngawakilan sadayana, hartosna sadayana ogé otomatis aruningaeun. Upama Kang Oman ngakukeun ngawakilan sadayana bari ukur sababaraha urang nu uninga, naha éta kalebet étis di dunya milis? 3. Surat kuring ka japri henteu diwalonan baé, antukna dicemplungkeun ka group. Malah upama henteu diwalonan kénéh mah pasti bakal dipidangkeun di galuh-purba.com, jeung dikirimkeun ka sunda.web.id, herni2nisih.blogspot.com, putrisunda.multiply.com, sarta situs-situs séjénna anu kasawang bakal kersaeun ngamuat tulisan (sanés omongan) kuring. Di darat ogé, kuring sok kitu. Lamun tulisan henteu dimuat di hiji média massa, pasti kuring bakal néangan média séjénna anu kersaeun ngamuat tulisan kuring. Pasti bakal aya nu kersaeun, da kuring yakin Gusti Alloh Maha Adil. Perkawis laporan waragad dina gempungan kamari, saumur nyunyuhun mastaka, aéh hulu, asa nembé ngaos laporan waragad dibarung ku susumpahan. Sigana kedah diajar akuntansi. Kang Oman nyebatkeun teu aya nu ngawaragadan, kajabi caneuteun jeung fasilitas di Wisma Unpad. Kumaha logikana éta kalimah téh? Apan caneuteun sareng fasilitas téh mangrupi waragad. Naha bet nyebat teu aya nu ngawaragadan? Cobi wé étang, sabaraha upami mésér caneuteun sareng sabaraha upami nyéwa fasilitas? Kalebet sumbangan moto kopi ti Kang Oman ogé, nu nambutkeun infokus, apan éta ogé kalebet waragad. Upama kuring mah, sigana bakal kieu basana téh: Alhamdulillah, pajemuhan parantos lumangsung kalayan diwaragadan ku Pangersa Ganjar Kurnia, mangrupi fasilitas Wisma Unpad, katuangan anu sakitu raoseunna, ditambih ku waragad ti simkuring mangrupi biaya moto kopi sareng mangusahakeun infokus. Nu langkung utami, maksad transparan téh sanés hartosna kedah susumpahan sagala, tapi sumangga konsultasi ka ahlina, neuleuman cara-carana ngalaporkeun hiji kagiatan. Dina pasualan uleman, anu didugikeun ku Kang Agus, éta ogé teu kénging dilalaworakeun. Ulah nyandak praktisna baé, komo bari alesanna henteu logis. Kantun ngeunteung wé ka HBH (Halal Bi Halal), anu lumangung kamari ieu di Cipayung waktos manggung aéh, "waktos manggung"-na mah henteu kalebet. Sanaos sadayana diulem, apan nu hadir téh henteu nyéépkeun tempat dugi ka heurin usik. Di Wisma Unpad ogé, asa piraku upami henteu kawadahan mah. Bet anu diulem ogé, sanés hiji-dua anu teu tiasa sumping téh, patali aya wagelan anu tangtos langkung utami. Mung hiji, ulah ngawartosan Miftahul Malik. Margi anjeunna mah sok aku-aku angga. Moal henteu, majarkeun téh éta anu ngarempel mangrupi massa anjeunna, tur siap milih Pa Agum Gumelar, Pa Dani Setiawan, atanapi Pa Ahmad Héryawan. Omat, jalmi éta mah sok kitu. Kang Kumi, aktivis wikipedia Sunda, satadina kuring moal nyabit-nyabit, sabab geus terang kana ketak Kang Kumi. Kuring salut tur kalintang ngajénan kana hanca gawé Kang Kumi anu tos napak tur kaala mangpaatna. Hébat pokona mah, Kang Kumi téh. Hanjakalna éta tulisan Kang Kumi (mairan Kang Agus jeung kuring) bet asa harianeun pisan. Kang Kumi kedahna obyéktif, ulah kéna-kéna diulem pikeun masihan présentasi. Sok mangga uningaan ku Kang Kumi, naon tujuanna éta pajemuhan anu digembor-gembor ku panitia? Sanés saukur masihan présentasi ka urang darat ti urang internét. Tapi tujuanna téh "nepungkeun anu giat di internét jeung anu di darat". Upama Kang Kumi gaduh pamadegan siga kitu,hartosna Kang Kumi gaduh angkeuhan yén urang internét langkung palalinter batan urang darat, anu antukna urang internét mah dianggap teu penting ngabandungan preséntasi ti urang darat. Pamungkasna, hawatos ka Kang Agus sareng ka sadayana anu nganti-nganti hasil gempungan. Sumangga, geura tembrakeun baé siga kumaha kacindekanna téh. Anu ngintun poto mah tos seueur. Hatur nuhun pisan ka nu ngarintun poto, aya geuning nu katingalina masih lalagasan, mudah-mudahan kersaeun dijodokeun ka Agus Bebeng. Tapi aduh, pangapunten nun ka Pangersa mrachmat uidipura, éta mani diuar-uar disebat tamu henteu diondang. Pami ninggang ka kuring, tangtos bakal éra parada. Padahal mah teu kedah disebatkeun: henteu diondang. Margi, kesan "henteu diondang" mah dikaitkeun kana sagala rupi ogé bakal négatif, kajaba tamu ti "Cibeureum" anu sok maneuh sumping ka Nyi Mojang. Sakitu anu kapihatur. Kirang sareng langkungna, neda agung cukup lumur jembar pangampunten; ti luhur sausap rambut- ti handap sahibas dampal ti tengah sakuliah nu gagah. Hurip Sunda Baktosna Dhipa Galuh Purba (Ka sadayana, upami nuju salsé atanapi nuju riweuh, sumangga dihaturanan lalinggih ka rorompok kuring, di: http://galuh-purba.com) --- In [email protected], kumincir <[EMAIL PROTECTED]> wrote: > > Euh... Kusabab disabit, nya 'kapaksa' kuring ngilu ngomong, najan sabenerna > nu langkung payus mah cekap ti pihak panitia (atos ti Kang Oman). > > Intina mah kieu, acara kamari teh presentasi atawa pidangan ti kusnet keur > nu di darat. Mun nu diulem urang Kusnet keneh, naon anehna atuh? Anu datang > ti Kusnet, misalna wae kuring, nya memang rek presentasi ka nu sarumping. > Kitu tah... > > On 2/4/08, Budhi Setiawan wrote: > > > > On 2/4/08, Agus K PAKUSARAKAN wrote: > > > > > > hiji pertarosan abdi ari anu giat kana budaya sunda anu kumaha? > > > > > nu disebat giat nyaeta nu ngiringan nyerat dina wikipedia basa sunda ... > > ceuk kang kumincir bari lumpat ... > > > > > -- > sikandar > kumincir.blogspot.com >
